पुणे: स्थानिक स्वराज्य संस्थांच्या सार्वत्रिक निवडणुकांमध्ये विहित मुदतीत निवडणूक खर्चाचा हिशेब सादर न केल्याप्रकरणी पुणे विभागातील २४ उमेदवारांना पुढील तीन वर्षांसाठी अपात्र घोषित करण्यात आले आहे. महाराष्ट्र राज्य निवडणूक आयोगाच्या आदेशानुसार विभागीय आयुक्त शीतल तेली-उगले यांनी ही कारवाई केली.
अपात्र ठरविण्यात आलेल्या उमेदवारांमध्ये सांगली-मिरज-कुपवाड महानगरपालिकेतील एक, चाकण नगरपरिषदेतील दहा आणि फुरसुंगी-उरुळी देवाची नगरपरिषदेतील तेरा उमेदवारांचा समावेश आहे. संबंधित उमेदवारांनी महाराष्ट्र महानगरपालिका अधिनियम तसेच महाराष्ट्र नगरपरिषद, नगरपंचायत व औद्योगिक नगरी अधिनियम, १९६५ मधील तरतुदीनुसार निवडणुकीचा खर्च ३० दिवसांच्या विहित कालावधीत सादर केला नव्हता.
आयुक्त, सांगली-मिरज-कुपवाड महानगरपालिका आणि जिल्हा सहआयुक्त, पुणे यांनी सादर केलेल्या प्रस्तावांवर विभागीय आयुक्त कार्यालयात १३ जुलै रोजी सुनावणी घेण्यात आली. मात्र, संबंधित उमेदवारांकडून समाधानकारक खुलासा न मिळाल्याने त्यांना अपात्र घोषित करण्याचा निर्णय घेण्यात आला.
यापूर्वीही पुणे महानगरपालिकेतील २२, पंढरपूर नगरपरिषदेतील १५ आणि अक्कलकोट नगरपरिषदेतील तीन अशा ४० उमेदवारांवर याच कारणामुळे तीन वर्षांची अपात्रता लागू करण्यात आली होती. त्यामुळे आतापर्यंत पुणे विभागातील महानगरपालिका आणि नगरपरिषदांच्या निवडणुकांतील एकूण ६४ उमेदवारांवर निवडणूक खर्चाचा हिशेब वेळेत सादर न केल्याबद्दल कारवाई करण्यात आली आहे. अपात्र घोषित करण्यात आलेल्या उमेदवारांची यादी संबंधित जिल्हाधिकारी कार्यालय तसेच संबंधित स्थानिक स्वराज्य संस्थांच्या कार्यालयात उपलब्ध असल्याचे प्रशासनाने स्पष्ट केले आहे.
