नारायणगाव: पुणे जिल्हा सहकारी बँकेच्या संचालक मंडळाची पंचवार्षिक निवडणूक काही महिन्यांवर येऊन ठेपली असताना राज्यातील दुष्काळी परिस्थितीच्या पार्श्वभूमीवर निवडणुकीबाबत उत्सुकता निर्माण झाली आहे. पुणे जिल्ह्यातील अनेक तालुके दुष्काळी जाहीर करण्यात आले असल्याने बँकेची निवडणूक नियोजित वेळेत होणार, की पुढे ढकलली जाणार, याकडे सहकारक्षेत्राचे लक्ष लागले आहे.
बँकेच्या विद्यमान संचालक मंडळाची मुदत डिसेंबरमध्ये संपत आहे. प्रशासनाने निवडणुकीची पूर्वतयारी सुरू केली असून, मतदार याद्या तयार करण्याच्या कामाला वेग आला आहे. निवडणुकीची प्रशासकीय प्रक्रिया सुरू असली तरी दुष्काळी परिस्थितीमुळे निवडणूक पुढे ढकलण्याचा निर्णय होणार का, याबाबत सहकारक्षेत्रात चर्चा सुरू आहे.
त्यामुळे प्रशासनाच्या पुढील निर्णयाकडे सर्वांचे लक्ष लागले. वेळेत निवडणूक झाली तर निवडणुकीत रंगत येऊ शकते. मात्र, निवडणूक पुढे ढकली तर उमेदवारांना फार मेहनत घ्यावी लागणार आहे. 'अ' वर्ग मतदारसंघातील विकास सोसायट्यांनी प्रतिनिधी निश्चितीसाठी केलेले ठराव सहाय्यक निबंधक कार्यालयाकडे पाठविले आहेत.
तसेच 'ब' वर्ग मतदारसंघातील मतदारांची प्राथमिक यादी तयार केली आहे. 'क' वर्ग मतदारसंघातील संस्थांची मतदार यादी तयार करण्याचे काम सुरू असून, 'ड' वर्ग मतदारसंघातील मतदार यादीची कच्ची यादी तयार करण्याचे कामही प्रशासनाकडून सुरू आहे.
कोणत्याच पॅनेलची अद्याप घोषणा नाही
सोमेश्वर सहकारी साखर कारखान्याच्या पंचवार्षिक निवडणुकीबाबत अद्याप कोणत्याही प्रमुख पक्षाकडून अंतिम उमेदवार यादी जाहीर झालेली नाही. त्यामुळे उमेदवारांच्या निवडीबाबतची उत्सुकता कायम आहे. कोणत्या गटातून कोणाला संधी मिळणार, कोणाचा पत्ता कट होणार, याकडे सभासदांचे लक्ष लागले आहे. सर्वाधिक उत्सुकता राष्ट्रवादी काँग्रेस (अजित पवार) गटाच्या पॅनेलबाबत आहे. कारखान्याच्या २१ जागांसाठी छाननीनंतर ५१४ उमेदवार रिंगणात आहेत. भाजप, राष्ट्रवादी काँग्रेसचे दोन्ही गट, शिवसेनेचे दोन्ही गट तसेच अपक्ष उमेदवारांमुळे निवडणुकीचे चित्र सध्या बहुरंगी झाले आहे.
