पुणे: भारती विद्यापीठ परिसरातील एका उपाहारगृहात गॅसगळती झाल्यानंतर चार कामगार किरकोळ स्वरूपात भाजले. त्यांच्या हाताला आणि पायाला दुखापत झाली आहे. भारती विद्यापीठ परिसरात नादबह्म इडली हे उपाहारगृह आहे. शुक्रवारी (दि.27) सायंकाळी उपाहारगृहात गॅसगळती झाली. भडका उडाल्याने भटारखान्यात काम करणारे चार कामगार भाजले.
या घटनेची माहिती अग्निशमन दलाला मिळाली. अग्निशमन दलाचे जवान घटनास्थळी पोहोचेपर्यंत नागरिकांनी कामगारांना खासगी रुग्णालयात दाखल केले. कामगारांच्या हात आणि पायाला किरकोळ स्वरूपाची दुखापत झाली आहे. अग्निशमन दलाच्या जवानांनी गॅसगळती रोखली. गॅसगळती झाल्यानंतर भडका उडाला.
उपाहारगृहातील छताचे नुकसान झाले, तसेच खिडक्यांचा काचा फुटल्या. जवानांनी उपाहारगृहाची पाहणी केली. तेथे व्यावसायिक वापराचे दोन सिलिंडर आढळून आले. गॅसगळती रोखल्यानंतर उपाहारगृहाची पाहणी केली. त्यानंतर धोका नसल्याची खात्री केल्यानंतर जवान तेथून रवाना झाले.
