राजगुरुनगर : येथील एका नवरात्रोत्सव मंडळाच्या कार्यक्रमात गरबा नृत्यकलेचे प्रदर्शन करताना नृत्यकलेत निपुण असलेल्या कलाकाराचा हृदयविकाराच्या तीव्र झटक्याने जागीच मृत्यू झाला. ही घटना सोमवारी (दि. ७) रात्री दहाच्या सुमारास घडली. अशोक माळी (रा. माळीमळा, राजगुरुनगर, मूळ गाव होळ, ता. शिंदखेडा, जि. धुळे) असे या कलाकाराचे नाव आहे. या घटनेमुळे परिसरात शोककळा पसरली आहे.
माळी हे खानदेशी नृत्यकलेत निपुण होते. गरबाकिंग म्हणूनही त्यांना ओळखले जात होते. नोकरी व्यवसायानिमित्त ते राजगुरुनगर येथे वास्तव्याला होते. एका लहान मुलासोबत ते रास दांडिया खेळायला आले होते. काही वेळानंतर ते जागेवरच कोसळले. आयोजकांनी उपचारासाठी त्यांना खासगी रुग्णालयात दाखल केले; मात्र उपचारापूर्वीच डॉक्टरांनी त्यांना मृत घोषित केले.