लोणी-धामणी(पुणे); पुढारी वृत्तसेवा : आंबेगाव तालुक्यातील धामणी-पहाडदरा- अवसरी बुद्रुक (हिंगेवस्ती) या घाटाच्या संरक्षक कठड्यांची लोखंडी जाळी गायब झाली आहे. परिणामी, वळणावर अपघात होण्याची दाट शक्यता निर्माण झाली आहे. लोणी, धामणी, पहाडदरा, खडकवाडी, वडगावपीर, मांदळेवाडी, शिरदाळे या परिसरातील शेतकर्यांसाठी मंचर, घोडेगाव, नारायणगाव येथे जाण्या-येण्यासाठी पहाडदरा घाट रस्ता हा जवळचा मार्ग आहे.
शेतमाल वाहतूक, प्रवासी, विद्यार्थी यांना या जवळच्या मार्गामुळे प्रवास सोपा झाला आहे. घाट रस्त्यावरील वळणावर अपघात होऊ नये, यासाठी संबंधित सार्वजनिक बांधकाम विभागाने लोखंडी संरक्षक कठडे बसवले आहेत. मात्र, या कठड्यांना बसवलेले लोखंडी पत्रे मात्र गायब झाले आहेत.
घाट रस्त्यावर नियमितपणे वाहतूक सुरू असते. अवसरी बुद्रुक बाजूला रस्ता आधीच नादुरुस्त झालेला आहे. अजून त्याचीच दुरुस्ती झालेली नाही. त्यात संरक्षक कठडेही नादुरुस्त झाल्याने या मार्गावरील प्रवाशांनी नाराजी व्यक्त केली आहे. मार्गाची लवकरात लवकर दुरुस्ती करण्याची मागणी खरेदी-विक्री संघाचे माजी अध्यक्ष भगवान वाघ, अध्यक्ष मच्छिंद्र वाघ, सरपंच राजश्री कुरकुटे व प्रवाशांनी केली आहे.
