Pune: कृषी उत्पन्न बाजार समितीच्या गुलटेकडी मार्केट यार्डातील तरकारी विभागात राज्यासह परराज्यांतून होणारी फळभाज्यांची आवक गत आठवड्याच्या तुलनेत टिकून आहे. आवक-जावक कायम असल्याने लसूण वगळता सर्व फळभाज्यांचे भाव मागील आठवड्याच्या तुलनेत स्थिर आहेत. बाजारात दाखल होत असलेल्या मालाच्या तुलनेत मागणी जास्त असल्यामुळे लसणाच्या भावात 10 ते 15 टक्क्यांनी वाढ झाली असल्याची माहिती ज्येष्ठ अडतदार विलास भुजबळ यांनी दिली.
गुलटेकडी मार्केट यार्डात रविवारी (दि. 10) राज्याच्या विविध भागांसह परराज्यांतून मिळून सुमारे 90 ते 100 ट्रक फळभाज्यांची आवक झाली. परराज्यातून झालेल्या आवकमध्ये कर्नाटक, गुजरात येथून हिरवी मिरची 8 ते 10 टेम्पो, कर्नाटक आणि गुजरात येथून कोबी 4 ते 5 टेम्पो, कर्नाटक येथून पावटा 2 टेम्पो, आंध्रप्रदेश, तमिळनाडू येथून शेवगा 3 ते 4 टेम्पो, इंदौर येथून 6 ते 7 टेम्पो गाजर, कर्नाटक आणि गुजरात येथून घेवडा 2 ते 3 टेम्पो, गुजरात येथून 3 टेम्पो भुईमुग शेंग, मध्यप्रदेश येथून लसणाची सुमारे 8 ते 10 टेम्पो इतकी आवक झाली होती.
स्थानिक भागातून झालेल्या आवकमध्ये सातारी आले सुमारे 400 ते 500 गोणी, भेंडी 5 ते 6 टेम्पो, गवार 5 ते 6 टेम्पो, टोमॅटो दहा ते अकरा हजार पेटी, हिरवी मिरची 3 ते 4 टेम्पो, काकडी 7 ते 8 टेम्पो, फ्लॉवर 8 ते 10 टेम्पो, कोबी 3 ते 4 टेम्पो, सिमला मिरची 7 ते 8 टेम्पो, भुईमुग शेंग 40 ते 50 गोणी, पुरंदर,
पारनेर, वाई आणि सातारा परिसरातून मटारची 40 ते 50 गोणी, तांबडा भोपळा 8 ते 10 टेम्पो, कांदा सुमारे 80 ट्रक, इंदौर, आग्रा, स्थानिक भागातून मिळून बटाट्याची 40 ते 45 ट्रक आवक झाली होती.
कोथींबीर, मेथीच्या भावात घट
मागणी आणि पुरवठा यातील समतोलामुळे कोथिंबिर आणि मेथी वगळता सर्व पालेभाज्यांचे भाव मागील आठवड्याच्या तुलनेत स्थिर आहेत. आवकच्या तुलनेत मागणी कमी असल्यामुळे कोथिंबिर आणि मेथीच्या भावात मात्र घाऊक बाजारात जुडीमागे 3 ते 4 रुपयांनी घट झाली आहे. मार्केट यार्ड येथील घाऊक बाजारात रविवारी (दि. 10) कोथिंबिरीची सुमारे सव्वा लाख जुडी तर मेथीची 35 हजार जुडींची आवक झाली होती. ही आवक मागील आठवड्याच्या तुलनेत स्थिर आहे. घाऊक बाजारात कोथिंबिर आणि मेथीच्या जुडीला अनुक्रमे 8 ते 18 रुपये आणि 15 ते 25 रुपये भाव मिळाल्याचे व्यापार्यांनी सांगितले.
