सुषमा नेहरकर-शिंदे
पुणे : ग्रामीण भागाच्या विकासासाठी अत्यंत महत्त्वपूर्ण असलेल्या जिल्हा नियोजन समितीचा निधी वाटप व कामे अंतिम करण्याचे नियोजन सध्या दौंडचे भाजप आमदार राहुल कुल व भाजपचे मावळ तालुक्यातील माजी आमदार बाळा भेगडे यांच्या पातळीवर सुरू आहे. पालकमंत्री चंद्रकांत पाटील यांच्या सूचनेनुसार या दोघांवर ही जबाबदारी देण्यात आली. भाजप-बाळासाहेबांची शिवसेनेचे स्थानिक नेते, कार्यकर्ते यांच्याशी समन्वय साधून कामांच्या याद्या तयार करण्याचे काम सुरू असल्याचे स्पष्ट झाले आहे.
राज्यात सत्तांतर होऊन शिंदे-फडणवीस सरकार सत्तेवर आले. जिल्ह्यातील जिल्हा परिषद, पंचायत समित्या, नगरपालिकांवर प्रशासक असल्याने सन 2022-23 च्या संपूर्ण निधीचे वाटप व कामांचे नियोजन राष्ट्रवादीचे नेते व माजी पालकमंत्री अजित पवार यांच्या मर्जीनुसार करण्यात आले.
यामुळे एकूण निधीचा 60 टक्के निधी एकट्या बारामती, इंदापूर आणि आंबेगाव तालुक्यात वाटप करण्यात आला व शिल्लक 40 टक्के निधीचे अन्य दहा तालुक्यांत वाटप करण्यात आले. ही बाब लक्षात आल्यानंतर शिंदे-फडणवीस सरकारने तातडीने जिल्हा नियोजन समितीच्या कामांना व निधी वाटपाला स्थगिती दिली आणि पालक मंत्र्यांच्या नियुक्त्या झाल्यानंतर ही स्थगिती उठविण्यात आली.
पुणे जिल्ह्याचे पालकमंत्री चंद्रकांत पाटील यांनी जिल्हा नियोजन समितीची आढावा बैठक घेऊन बारामती, इंदापूर आणि आंबेगावच्या निधीला मोठा कट लावत जिल्ह्यात सर्व तालुक्यांना समान निधी वाटप करण्याचे धोरण स्वीकारले. त्यानुसार आता नव्याने जिल्हा नियोजन समितीच्या कामांचे नियोजन सुरू आहे.
राहुल कुल आणि बाळा भेगडे यांनी सर्वांकडून याद्या घेऊन कामे निश्चित करण्याचे काम सुरू आहे. पुणे जिल्ह्यासाठी सध्या 2022-23 या आर्थिक वर्षासाठी 875 कोटी रुपयांचा विकास आराखडा मंजूर करण्यात आला आहे. आगामी स्थानिक स्वराज्य संस्थांच्या निवडणुकीच्या पाश्र्वभूमीवर एवढ्या मोठ्याप्रमाणात निधी वाटप व नियोजन करण्याची जबाबदारी आता कुल आणि भेगडे यांच्यावर सोपविण्यात आली आहे.
पालकमंत्री चंद्रकांत पाटील यांच्या सूचनेनुसार स्थानिक लोकप्रतिनिधी व कार्यकर्ते यांच्याशी समन्वय साधून ग्रामीण भागातील कामांची यादी मागविण्यात आली आहे. बहुतेक सर्वांच्या याद्या व शिफारशी प्राप्त झाल्या असून, चंद्रकांत पाटील यांच्या मंजुरीनंतरच जिल्हा नियोजन समितीचा निधी व कामांचे वाटप करण्यात येणार आहे. यासाठी सर्व तालुक्यांना समान न्याय देण्याचा प्रयत्न पालकमंत्र्यांनी केला आहे.
– राहुल कुल,
भाजप आमदार,दौंड
