विनोद माझिरे
पिरंगुट: मुळशी तालुक्यातील भुगाव, भुकूम, पिरंगुट घाट आणि घोटावडे फाटा परिसरात मोठ्या प्रमाणावर कचरा टाकला जात असून घाट परिसर डम्पिंग ग््रााउंड बनल्याचे चित्र दिसत आहे. काही फळविक्रेते, भाजीविक्रेते तसेच नागरिकांकडून दुकानातील आणि घरगुती कचरा रस्त्याच्या कडेला फेकला जात असल्याने परिसर अस्वच्छ झाला आहे.
कोलाड महामार्गावरील पिरंगुट घाटात मोठ्या प्रमाणावर कचरा साचला असून, नागरिक प्लास्टिकच्या पिशव्यांमध्ये घरगुती कचरा भरून घाटात टाकत आहेत. ग््राामपंचायतीकडून वारंवार कचरा उचलला जात असला तरी पुन्हा त्याच ठिकाणी कचरा टाकला जात असल्याचे दिसत आहे.
म्हसोबा खिंडीतून लवासाकडे जाणाऱ्या रस्त्यालगतही मोठ्या प्रमाणावर कचरा फेकण्यात आला आहे. यामध्ये पीओपी साहित्य, लग्नसमारंभातील सजावटीचे साहित्य आणि फळांच्या प्लास्टिक वेष्टनांचा समावेश आहे. स्थानिकांच्या मते, कचरा टाकणाऱ्यांमध्ये बाहेरून नोकरी-व्यवसायासाठी आलेल्या नागरिकांचा मोठा सहभाग आहे. घाट परिसरातील कचऱ्यामुळे दुर्गंधी पसरत असून, पर्यटक आणि स्थानिक नागरिकांच्या आरोग्याचा प्रश्न निर्माण झाला आहे. तसेच काही दुकानदार आणि हॉटेल व्यावसायिकही कचरा पोती व प्लास्टिक पिशव्यांमध्ये भरून रस्त्याच्या कडेला टाकत असल्याचे दिसत आहे.
