पाटस: पाटस (ता. दौंड) येथील भीमा पाटस सहकारी साखर कारखान्याच्या बगॅसला सोमवारी (दि. ३०) सकाळी सुमारे सव्वा दहाच्या दरम्यान अचानक आग लागल्याची घटना घडली. या भीषण आगीत बगॅस भरण्यासाठी उभा असलेला एक ट्रक पूर्णपणे जळून खाक झाला. दोन अग्निशामक गाड्या आग आटोक्यात आणण्यासाठी उपलब्ध झाल्या आहेत.
मिळालेल्या माहितीनुसार, कारखान्याच्या परिसरातील बगॅसला अचानक आग लागली. आगीचे कारण अद्याप स्पष्ट झाले नसले तरी काही क्षणांतच आगीने विक्राळ रूप धारण केले. यावेळी घटनास्थळी उभा असलेला ट्रक आगीच्या विळख्यात सापडला आणि पाहता पाहता पूर्ण जळून खाक झाला. कारखान्याच्या दक्षिण दिशेला बगॅसचा मोठा साठा जमा असतो.
त्याच कारखान्याच्या संरक्षण भिंत बाहेरून मोटेवाडाकडील रोड, शेती व कारखाना शाळा आहे. ही आग लागल्याने त्या परिसरात नागरिकांची धावपळ उडाली होती. घटनेची माहिती मिळताच स्थानिक नागरिकांनी व संबंधित यंत्रणांनी तत्काळ धाव घेत आग आटोक्यात आणण्याचे प्रयत्न केले. सुदैवाने या घटनेत कोणतीही जीवितहानी झाली नाही; मात्र ट्रक पूर्णपणे जाळून खाक झाला व बगॅस ही खाक होत असल्याने मोठ्या प्रमाणात नुकसान झाले आहे. या आगीचे नेमके कारण काय, हे अजून समजले नाही याबाबत तपास सुरू आहे.
