पुणे: जमिनीच्या सातबारा उताऱ्यावरील वनक्षेत्राचे शेरे काढून टाकण्यासाठी एकाकडून चार लाख रुपयांची लाच घेणाऱ्या वन विभागातील वनक्षेत्र सर्व्हेक्षकास (मोजणी कर्मचारी) लाचलुचपत प्रतिबंधक विभागाने (एसीबी) रांगेहाथ पकडले. अरण्येश्वर परिसरात ही कारवाई केली. उदयसिंग भीमराव कुंभार (वय 46, सध्या रा. कात्रज, मूळ रा. सातारा) असे लाचखोर कर्मचाऱ्याचे नाव आहे. याप्रकरणी कुंभारविरुद्ध सहकारनगर पोलिस ठाण्यात गुन्हा दाखल केला आहे.
एसीबीच्या अधिकाऱ्यांनी दिलेल्या माहितीनुसार, तक्रारदार हे जमीन खरेदी-विक्री व्यवसाय करतात. वडगाव मावळ तालुक्यातील चिखलसेगाव, आपटी, कुणेनामा या गावात तक्रारदाराने जमीन खरेदी केली आहे. काही जमिनींच्या सातबारा उताऱ्यावर खासगी वनाचे शेरे लागले होते.
हे शेरे काढून टाकण्यासाठी त्यांनी महसूल विभागाकडून आदेश मिळवून त्याबाबतच्या नोंदी वन विभागाच्या कागदपत्रांवर घेण्यासाठी अर्ज दिला होता. याबाबतची प्रत मिळविण्याकरिता त्यांनी सेनापती बापट रस्त्यावरील उपवनसंरक्षक कार्यालयात अर्ज केला होता. या अर्जाच्या चौकशीसाठी ते वन विभागाच्या कार्यालयात गेले. हे काम वनक्षेत्र मोजणी कर्मचारी उदयसिंग कुंभार यांच्याकडे असल्याची माहिती त्यांना मिळाली.
कुंभार यांनी 11 आदेशांपैकी (रिस्टोर्ड ऑर्डर) 7 आदेशांच्या प्रती कार्यालयात आहेत. त्यासाठी सात लाख रुपयांची लाच कुंभार यांनी तक्रारदाराकडे मागितली. त्यानंतर तक्रारदाराने तडजोडीत चार लाख रुपये देण्याचे मान्य केले. रविवारी दुपारी साडेबारा वाजताच्या सुमारास एसीबीने सापळा लावला.
तक्रारदाराकडून चार लाख रुपयांची लाच घेताना कुंभार यांना पकडले. एसीबीचे पोलिस अधीक्षक शिरीष सरदेशपांडे, अतिरिक्त अधीक्षक अजित पाटील, अर्जुन भोसले यांच्या मार्गदर्शनात सहायक पोलिस आयुक्त सतीश वाळके आणि पथकाने ही कारवाई केली. पोलिस निरीक्षक प्रसाद लोणारे तपास करत आहेत.
