Shivraj Motegaonkar Son CBI Inquiry: NEET पेपरफुटी प्रकरणाच्या तपासात आता एक मोठी आणि धक्कादायक घडामोड समोर आली आहे. या प्रकरणात अटकेत असलेले मुख्य संशयित शिवराज मोटेगावकर यांच्यानंतर आता त्यांच्या मुलालाही केंद्रीय अन्वेषण विभागाने (CBI) चौकशीसाठी ताब्यात घेतल्याची माहिती समोर आली आहे. सध्या पुण्यातील CBI कार्यालयात त्याची कसून चौकशी सुरू असल्याचे सूत्रांनी सांगितले आहे.
माहितीनुसार, NEET परीक्षेतील कथित गैरव्यवहार आणि पेपरफुटी प्रकरणात मोटेगावकर यांच्या भूमिकेचा तपास अधिक खोलवर सुरू आहे. याच अनुषंगाने त्यांच्या मुलालाही चौकशीसाठी बोलावण्यात आले असून, तपास यंत्रणांकडून विविध आर्थिक आणि तांत्रिक दुव्यांची पडताळणी केली जात आहे.
तपास यंत्रणांना असा संशय आहे की, शिवराज मोटेगावकर यांनी स्वतःच्या मुलाला परीक्षेत फायदा मिळवून देण्यासाठी कथितरित्या पेपरफुटीचे जाळे वापरले असावे. या संशयाच्या आधारेच CBI ने आता मुलाची चौकशी सुरू केली असल्याची माहिती पुढे येत आहे.
मात्र, अधिकृत पातळीवर CBI कडून याबाबत कोणतेही निवेदन जारी करण्यात आलेले नाही. तसेच, तपास सुरू असल्याने चौकशीतील अनेक बाबी गोपनीय ठेवण्यात आल्या आहेत.
पुण्यातील CBI कार्यालयात मोटेगावकर यांच्या मुलाकडून पेपरफुटी प्रकरणातील संभाव्य संबंध, संपर्क आणि परीक्षेशी संबंधित काही महत्त्वाच्या बाबींवर प्रश्न विचारले जात असल्याचे सूत्रांचे म्हणणे आहे. यापूर्वी शिवराज मोटेगावकर यांना अटक झाल्यानंतर तपासाचा फोकस त्यांच्या नेटवर्कवर होता. आता त्यांच्या कुटुंबीयांपर्यंत तपास पोहोचल्याने प्रकरण आणखी गंभीर झाले आहे.
NEET पेपरफुटी प्रकरण आधीच देशभरात चर्चेचा विषय ठरले आहे. आता या चौकशीमधून आणखी काही महत्त्वाचे धागेदोरे समोर येतात का, तसेच मोटेगावकर यांच्याविरोधातील संशय अधिक बळकट होतो का, याकडे सर्वांचे लक्ष लागले आहे.
दरम्यान, चौकशी पूर्ण होईपर्यंत कोणताही निष्कर्ष काढणे घाईचे ठरेल, कारण तपास यंत्रणांकडून अद्याप अधिकृत माहिती समोर आलेली नाही.
