पुणे: भोर तालुक्यातील नसरापूर येथे साडेतीन वर्षांच्या चिमुकलीवर लैंगिक अत्याचार करून तिची निर्घृण खून केल्याप्रकरणी सुरू असलेल्या खटल्यात बुधवारी महत्त्वपूर्ण साक्ष नोंदविण्यात आली. आरोपी भीमराव प्रभाकर कांबळे (वय 65) याने गुन्हा केल्यानंतर दोन ग््राामस्थांकडे गुन्ह्याची ‘न्यायबाह्य कबुली’ दिल्याची धक्कादायक माहिती साक्षीदाराने न्यायालयात दिली.
विशेष न्यायाधीश एस. आर. साळुंखे यांच्या न्यायालयात हा खटला सुरू आहे. बुधवारी एकूण सहा साक्षीदारांची साक्ष नोंदविण्यात आली. आरोपीने चिमुकलीचे अपहरण करण्यासाठी तिला गाठीशेवेचे आमिष दाखविले होते. ही गाठीशेव ज्या विक्रेत्याकडून खरेदी केली होती, त्या मिठाई विक्रेत्याची साक्ष आणि उलटतपासणी या वेळी पूर्ण करण्यात आली.
आतापर्यंत एकूण 23 साक्षीदारांची साक्ष विशेष सरकारी वकील अजय मिसर यांनी नोंदविली; तर बचाव पक्षातर्फे ॲड. हिंमतराव सूर्यवंशी यांनी उलटतपासणी घेतली. तक्रारदार पीडित कुटुंबातर्फे ॲड. मनीष पाडेकर व ॲड. मयूर दोडके यांनी काम पाहिले. आरोपीने चिमुकलीला गाठीशेव देण्याचे आणि गायीचे वासरू दाखविण्याचे आमिष दाखवून तिचे अपहरण केले.
त्या आधी आरोपीने एका मिठाई विक्रेत्याकडून गाठीशेव विकत घेतली होती. या विक्रेत्याची साक्ष व उलटतपासणी नोंदविण्यात आली. गुन्हा केल्यानंतर आरोपी पळून गेला होता. सीसीटीव्ही चित्रीकरणात आरोपी पीडित मुलीला घेऊन जाताना दिसल्याने दोन ग््राामस्थांनी मोटारसायकलवरून त्याचा शोध सुरू केला.
त्या वेळी एका मंदिराजवळ आरोपी सापडला. त्याला जाब विचारला असता, आरोपीने चूक झाल्याचे सांगत पीडित मुलीला मारल्याची न्यायबाह्य कबुली एका ग््राामस्थाकडे दिली होती. या ग््राामस्थाची साक्ष व उलटतपासणीची प्रक्रियाही पूर्ण करण्यात आली. याप्रकरणी आज (गुरुवारी) पुढील साक्षीदारांची साक्ष व उलट तपासणीची प्रक्रिया सुरू राहणार असल्याचे विशेष सरकारी वकील अजय मिसर यांनी सांगितले.
