पारगाव(पुणे); पुढारी वृत्तसेवा : रांजणी (ता.आंबेगाव) गावचे ग्रामदैवत श्रीनरसिंह मंदिराचे काम अंतिम टप्प्यात आले आहे. देणगी रूपाने ग्रामस्थांनी मंदिरासाठी सुमारे दोन कोटी रुपये खर्च केला आहे. अजूनही मंदिराच्या किरकोळ कामांसाठी सुमारे 75 ते 80 लाख रुपये खर्च होणार असल्याचे ग्रामस्थांनी सांगितले. हेमांडपथीय मंदिराचा पुन्हा ग्रामस्थांनी जीर्णोद्धार करण्याचे ठरविले.
त्यानुसार 22 फेब्रुवारी 2018 रोजी भूमिपूजन केले. तब्बल पाच वर्षे मंदिराचे काम सुरू आहे. 71 बाय 71 फूट आकाराचे हे मंदिर असून, परिसरातील सर्वांत मोठे मंदिर आहे. तळमजल्यात मोठे भक्तनिवास बांधले आहे. मंदिराच्या उत्तर दिशेला मीना नदी आहे. या बाजूने मंदिराच्या घाटाचे बांधकाम सुरू आहे. मंदिराचे रंगकाम, कळसांचे काम, विद्युत रोषणाई, नक्षीकाम सध्या सुरू आहे. ते लवकरच पूर्ण होईल, असे सांगण्यात आले.
गावातील श्रीनरसिंहाचे जागृत देवस्थान आहे. थोरले बाजीराव पेशवे हे निजामाच्या स्वारीवर जात असताना रांजणीत नरसिंहदेवाच्या दर्शनासाठी थांबले. मला लढाईत यश मिळू दे, मी मंदिराचा जीर्णोद्धार करीन, असा नवस त्यांनी भगवान नरसिंह महाराजांना केला. लढाईत थोरले बाजीराव पेशव्यांना यश मिळाले. परंतु त्यांचा पुढील काळ खडतर असाच गेला. मंदिर बांधण्याचा नवस पूर्ण करता आला नाही. नाना फडणवीसांनी हे मंदिर बांधून थोरले बाजीराव पेशव्यांचा नवस पूर्ण केल्याची आख्यायिका सांगितली जाते.
