पुणे: गणेशोत्सवासह वर्षभरात वेगवेगळ्या सण, उत्सवांसाठी केल्या जाणार्या प्लास्टर ऑफ पॅरिसच्या (पीओपी) मूर्ती बनविण्यास तसेच त्या पाण्यात विसर्जित करण्यास बंदी घालण्याचा निर्णय महापालिकेने घेतला आहे. त्यानुसार पीओपी मूर्ती बनविणारांवर कारवाई केली जाणार आहे.
महापालिकेचे अतिरिक्त आयुक्त पृथ्वीराज बी. पी. यांनी यासंबंधीचे आदेश काढले आहेत. पीओपीच्या बंदीबाबत उच्च न्यायालयात दाखल जनहित याचिकेवर विविध सण- उत्सवांदरम्यान सर्व महापालिका, सर्व जिल्हाधिकारी यांनी केंद्रीय प्रदूषण नियंत्रण मंडळाच्या सुधारित मार्गदर्शक तत्त्वांतील कलम 2 नुसार प्लास्टर ऑफ पॅरिसच्या मूर्ती बनविणे अथवा विसर्जित करणे, यावर पूर्णपणे बंदीच्या आदेशाचे काटेकोरपणे पालन करण्याचे निर्देश न्यायालयाने दिले आहेत.
त्यानुसार यापुढील सर्व सण- उत्सवांसंदर्भात वेळोवेळी देण्यात आलेल्या निर्देशांचे उल्लंघन झाल्यास पर्यावरण (संरक्षण) अधिनियम 1986 अन्वये, संबंधितांवर कारवाई केली जाईल, असे आदेश अतिरिक्त आयुक्त बी. पी. यांनी दिले आहेत.
मार्गदर्शक सूचना
महापालिका क्षेत्रात मूर्ती या नैसर्गिक, पर्यावरणपूरक जैवविघटक पदार्थांपासून कराव्यात. पीओपीपासून तयार केलेल्या मूर्ती बनविणे अथवा विसर्जित करणे यावर पूर्णपणे बंदी असेल. मूर्तीचे विसर्जन कृत्रिम तलावात तसेच मूर्ती स्वीकृती केंद्रामध्ये देणे बंधनकारक आहे. रंग जैव विघटनशील आणि बिनविषारी, नैसर्गिक असावेत. विषारी व अविघटनशील रासायनिक रंग ऑईल पेंट्स, कृत्रिम रंग वापरण्यास मनाई. पूजेसाठी फुले, वस्त्र, इ. पूजा साहित्य पर्यावरणपूरक असावे.
काच, धातूपासून बनविलेल्या ताट- वाट्यांचा वापर करावा. अन्नदानासाठी एकवेळ वापराचे प्लास्टिक प्लेट, प्लास्टिक साहित्य वापरू नये. मूर्तींचे दागिने बनविताना वाळलेल्या फुलांचे घटक, पेंढा इत्यादीचा वापर करावा.
