पुणे: मुंबई पोलिस दलात कार्यरत असलेल्या एका पोलिस उपनिरीक्षकावर वारजे पोलिस ठाण्यात तरुणीवर लैंगिक अत्याचार केल्याप्रकरणी गुन्हा दाखल केला आहे. स्पर्धा परीक्षेची तयारी करीत असताना तरुणीसोबत लिव्ह इनमध्ये राहून तिला लग्न करण्याचे वचन दिले.
पण, पोलिस उपनिरीक्षक म्हणून निवड झाल्यानंतर सलग दोन वर्षे तरुणीला टाळटाळ करून तिच्याशी लग्न न करता तिची फसवणूक केली. एवढेच नाही, तर तरुणी गर्भवती राहिल्यानंतर तिला बळजबरीने गर्भपात करण्यासही भाग पाडल्याचे समोर आले आहे. याप्रकरणी स्वदेश विजय चव्हाण (वय 31) असे गुन्हा दाखल झालेल्या पोलिस उपनिरीक्षकाचे नाव आहे.
याबाबत वारजे माळवाडी पोलिस ठाण्यात 31 वर्षीय तरुणीने फिर्याद दिली आहे. स्वदेश व पीडित तरुणी पुण्यातील वारजे माळवाडी भागात राहण्यास होते. ती एका बँकेत क्लर्क म्हणून नोकरी करीत होती. तर, स्वदेश स्पर्धा परीक्षेची तयारी करत होता.
दोघे दोन वर्षे लिव्ह इनमध्ये राहत होते. स्वदेशने तिला लग्न करू, असे सांगितले होते. लिव्ह इनमध्ये राहिल्यानंतर तरुणी गर्भवती राहिली होती. तेव्हा स्वदेशने तिचा गर्भपात केला होता. दरम्यान, नुकतीच स्वदेशची स्पर्धा परीक्षेतून पोलिस उपनिरीक्षक म्हणून निवड झाली. त्यानंतर त्याची नेमणूक मुंबई पोलिस दलात झाली. तो सध्या कुरार पोलिस ठाण्यात कार्यरत आहे.
दरम्यान, नोकरी लागल्यानंतर तरुणी त्याला लग्नाबाबत विचारणा करायची. तेव्हा तो विषय टाळाटाळ करू लागला. मार्च 2026 मध्ये स्वदेशने तरुणीला लग्नास नकार दिला. त्यानंतर आपली फसवणूक झाल्यावरून तरुणीने पोलिसांकडे तक्रार दिली. त्यानुसार पोलिसांनी गुन्हा नोंद केला आहे. अधिक तपास वारजे माळवाडी पोलिस करीत आहेत.
