Anganwadi News: 410 अंगणवाड्यांसाठी इमारत बांधणीचा ‘मास्टर प्लॅन’

पुणे: अंगणवाडी हा शिक्षणाचा प्राथमिक पाया मानला जातो. परंतु, जिल्ह्यातील 410 अंगणवाड्यांना इमारती नाहीत. या अंगणवाड्यांचा इमारतरूपी पायाच कच्चा असल्याने समाजमंदिरे, जुनाट खोल्यांमध्ये वर्ग भरविले जात आहेत. या अंगणवाड्यांसाठी पक्क्या इमारती बांधण्याचा ‘मास्टर प्लॅन’ पुणे जिल्हा परिषदेने आखला आहे.

शासनाकडून अंगणवाड्यांच्या इमारती बांधण्यासाठी तरतूद होऊ शकते. पण जागा खरेदी करण्याबाबत कोणतीही तरतूद नसल्याने चिमुरड्यांची गैरसोय होत आहे. ग्रामीण भागात अंगण परिसरात चालवले जाणारे माहिती केंद्र म्हणजे अंगणवाडी. (Latest Pune News)

महिला आणि बालकांच्या सर्वांगीण विकासावर अंगणवाडीमार्फत भर दिला जातो. तीन ते पाच वर्षे वयोगटातील बालकांना पूर्व प्राथमिक शिक्षण तसेच माता-बालकांचे आरोग्य, आहार, कुपोषण यासह इतर महत्त्वपूर्ण बाबींकडे लक्ष देण्याचे काम अंगणवाडीतूनच केले जाते.

भारत सरकारने 1975 मध्ये बालविकास योजना कार्यरत केली. गावात अंगणवाडीची गरज असल्यास तशी मागणी केल्यानंतर अंगणवाडीला मंजुरी दिली जाते. त्यानंतर ग्रामपंचायत तसेच लोकसहभागातून जागा उपलब्ध झाल्यास त्या ठिकाणी अंगणवाडीची इमारत बांधण्यासाठी निधी उपलब्ध होतो.

परंतु, अंगणवाड्या मंजूर असूनही ग्रामपंचायतीच्या उदासीनतेमुळे इमारतींना जागा उपलब्ध झाली नाही. त्यामुळे जिल्ह्यातील सुमारे 410 अंगणवाड्या इमारतीअभावी मंदिरात, तसेच सार्वजनिक आडोसा पाहून भरवल्या जातात. राष्ट्रीय शैक्षणिक धोरणानुसार प्राथमिक शाळेच्या आवारात अंगणवाडी केंद्राचे बांधकाम करण्यासाठी सर्वेक्षण केले आहे. जिल्हा नियोजन योजनेमध्ये अंगणवाडी बांधकाम करण्यासाठी तरतूद केली आहे.