पुणे: शासकीय आणि खासगी औद्योगिक प्रशिक्षण संस्था अर्थात आयटीआयमधील प्रवेश प्रक्रियेला अखेर सुरुवात होणार असून 21 मेपासून ऑनलाइन अर्ज भरण्याची प्रक्रिया सुरू करण्यात येणार आहे. राज्यभरात यंदा 1 लाख 57 हजार जागांवर प्रवेश प्रक्रिया राबविण्यात येणार असून, 1 जूनपासून विद्यार्थ्यांना प्राधान्यक्रम नोंदविता येणार असल्याचे व्यवसाय शिक्षण व प्रशिक्षण संचालनालयाने वेळापत्रकाद्वारे स्पष्ट केले आहे.
व्यवसाय शिक्षण व प्रशिक्षण संचालनालयातर्फे यंदाची प्रवेश प्रक्रिया केंद्रिकृत ऑनलाइन पद्धतीने राबविण्यात येणार असून, विद्यार्थ्यांना संकेतस्थळावर जाऊन अर्ज भरता येणार आहेत. अर्ज भरणे, शुल्क भरणे, कागदपत्रे पडताळणी आणि प्रवेशनिश्चितीची सुविधा याच पोर्टलवर उपलब्ध करून देण्यात आली आहे.
विद्यार्थ्यांना 1 जूनपासून व्यवसाय आणि संस्थानिहाय प्राधान्यक्रम (ऑप्शन फॉर्म) भरता येणार आहेत. दहावीची गुणपत्रिका संबंधित शाळांकडून वितरित झाल्यानंतर पुढील सविस्तर वेळापत्रक जाहीर करण्यात येणार असल्याचे संचालनालयाने स्पष्ट केले आहे.
प्रवेशासाठी खुल्या प्रवर्गातील विद्यार्थ्यांना 150 रुपये अर्ज शुल्क भरावे लागणार आहे. राखीव प्रवर्गासाठी 100 रुपये, राज्याबाहेरील विद्यार्थ्यांसाठी 300 रुपये आणि अनिवासी भारतीय विद्यार्थ्यांसाठी 500 रुपये शुल्क निश्चित केले आहे.
राज्यभरात सरकारी आणि खासगी मिळून एकूण 1,004 आयटीआय संस्था असून, त्यामध्ये 1 लाख 57 हजार 664 जागांवर प्रवेश प्रक्रिया राबविण्यात येणार आहे. राज्यातील 418 सरकारी आयटीआय संस्थांमध्ये 97 हजार 88 जागा उपलब्ध आहेत, तर 586 खासगी आयटीआय संस्थांमध्ये 60 हजार 576 जागांसाठी प्रवेश दिले जाणार आहेत.
