Maharashtra CID On Ajit Pawar Plane Crash Case
पुणे : दिवंगत नेते अजित पवार यांच्या अपघाती मृत्यूप्रकरणी रोहित पवार यांनी शंका उपस्थित केली असतानाच अखेर राज्य गुन्हे अन्वेषण विभाग म्हणजेच सीआयडीने याबाबत स्पष्टीकरण दिले आहे. ‘अजित पवार यांच्या विमान अपघाताचा तांत्रिक तपास हा संपूर्ण वेगळा भाग असून CID चा तपास हा आकस्मिक मृत्यू बद्दल आहे', असे सीआयडीचे अतिरिक्त पोलीस महासंचालक सुनील रामानंद यांनी गुरुवारी सांगितले.
अजित पवार यांच्या अपघाती मृत्यूप्रकरणी पोलिसांनी डीजीसीएविरोधात गुन्हा दाखल करावा, यासाठी रोहित पवार आक्रमक झाले आहेत. तसेच सीआयडीचा तपास कुठवर आला आहे, याची माहिती द्यावी, अशी मागणीही जोर धरु लागली होती. या पार्श्वभूमीवर गुरुवारी सीआयडीचे अतिरिक्त पोलीस महासंचालक सुनील रामानंद यांनी पत्रकार परिषद घेतली. पोलीस अधीक्षक (गुन्हे पथक) याप्रकरणाचा तपास करत असल्याचे स्पष्ट करतानाच रामानंद यांन तपासाचे तीन उद्देशही सांगितले.
CID तपासाचे तीन उद्देश कोणते?
1. कट किंवा घातपात आहे का?
2. गुन्हेगारी स्वरुपाचा निष्काळजीपणा आहे का?
3. गुन्हेगारीकृत्य आहे का?
CID योग्य कलमांखाली
तपासात घातपात, कट, गुन्हेगारी स्वरुपाचा निष्काळजीपणा किंवा कृत्य घडल्याचे निदर्शनास आल्यास सीआयडी याप्रकरणी गुन्हा दाखल करुन उर्वरित तपास पूर्ण करणार आणि न्यायालयात खटला चालवणार, असंही रामानंद यांनी सांगितले.
तपास योग्य दिशेने
अजित पवारांच्या विमान अपघाताप्रकरणी सीआयडीचा योग्य दिशेने तपास सुरू आहे. यात केंद्रीय यंत्रणांकडूनही अहवाल मागवले जात आहेत. तपास समाधानकारक आणि योग्य त्या वेगाने सुरू आहे, असा दावाही त्यांनी केला.
VSR कंपनीचा निष्काळजीपणा उघड झाला आहे का?
AAIB - विमान अपघात अन्वेषण ब्युरो आणि सीआयडी या दोन्ही यंत्रणाच्या तपासाचा व्याप यात भिन्नता आहे. मात्र, AAIB चा तपास अहवाल हा सीआयडीच्या अहवालातही जोडला जाणार आहे, अशी माहिती रामानंद यांनी दिली. VSR कंपनीबाबत त्यांनी थेट उत्तर दिलेलं नाही.
