पुणे: लष्कर भागातील एका नियोजित इमारतीच्या स्लॅबचा सज्जा कोसळून एका बांधकाम मजुराचा जागीच मृत्यू झाल्याची घटना मंगळवारी घडली. तर या दुर्घटनेत तीन मजूर गंभीर जखमी झाले असून, एकाची प्रकृती चिंताजनक आहे.
शुभंकर जधबा मंडल (वय 21, रा. पश्चिम बंगाल) असे मृत्युमुखी पडलेल्या बांधकाम मजुराचे नाव आहे. चेंन्नी मंगल मुखर्जी (वय 21, रा. कोलकात्ता), वरूण (वय 35), संन्याशी बकदी (वय 29) अशी गंभीर जखमी झालेल्यांची नावे आहेत. (Latest Pune News)
याप्रकरणी लष्कर पोलिसांनी दिलेल्या माहितीनुसार, लष्कर भागातील साचापीर स्ट्रीट परिसरातील मेहेर अपार्टमेंटच्या समोरच एका इमारतीचे बांधकाम सुरू आहे. इमारतीच्या चौथ्या मजल्याचा स्लॅब टाकण्यात आला आहे. स्लॅबला लाकडी फळी, सळई लावण्यात आली आहे. मंगळवारी (दि.1) दुपारी दोन वाजताच्या सुमारास मंडल, मुखर्जी, वरुण, बकदी हे चौथ्या मजल्यावर काम करत होते.
स्लॅबचा सज्जाजवळ असलेल्या सळई, तसेच फळ्यांची पाहणी करत असताना अचानक सज्जा कोसळला. चौघेजण तिसर्या मजल्यावर कोसळले. या चौघांना तातडीने ससून रुग्णालयात नेण्यात आले. उपचारांपूर्वीच शुभंकर याचा मृत्यू झाला होता, अशी माहिती लष्कर पोलिस ठाण्याचे वरिष्ठ पोलिस निरीक्षक गिरीशकुमार दिघावकर यांनी दिली.
दुर्घटना घडल्यानंतर पोलिस तीन तास उशिरा पोहोचल्याचा आरोप या भागातील रहिवाशांना केला. महावीर इन्व्हेस्टर्सचे सुनील रांका यांच्याकडून या इमारतीचे बांधकाम सुरू आहे. युवराज राऊत नावाची व्यक्ती ठेकेदार असल्याचे समजले आहे. ही घटना पोलिसांना लगेच का कळविली नाही, याची चौकशी केली जाणार आहे.
