Krishnanagar PMP bus service closed for five years
कोंढवा: गेल्या पाच वर्षांपासून कृष्णानगर-सारसबाग दरम्यानची पीएमपी बससेवा प्रशासनाने कोणतेही कारण न देता बंद केली आहे. नागरिकांनी याबाबत प्रशासनाकडे वारंवार पाठपुरावा करूनही ही बससेवा अद्याप सुरू करण्यात आली नाही.
यामुळे परिसरातील विद्यार्थी आणि प्रवाशांना पायपीट करावी लागत आहे. यंदाच्या शैक्षणिक वर्षांपासून ही बससेवा होईल, अशी आशा विद्यार्थ्यांना होती. मात्र, पीएमपीच्या अधिकार्यांकडून केवळ आश्वासनांची खैरात केली जात असल्याची भावना विद्यार्थी आणि नागरिकांनी व्यक्त केली आहे. (Latest Pune News)
गेल्या पाच वर्षांपूर्वी सारसबाग-कॄष्णानगरदरम्यान पीएमपी बससेवा सुरू होती. यामुळे विद्यार्थी आणि नागरिकांचा स्वारगेटपर्यंत प्रवास सुखकर होत होता. परंतु पीएमपी प्रशासनाने अचानक ही बससेवा बंद केली. तसेच या मार्गावरील बसथांबे देखील रात्रीत गायब केले. ही सेवा पुन्हा सुरू होण्यासाठी नागरिकांनी वारंवार प्रशासनाकडे पाठपुरावा केला. मात्र सुस्त प्रशासनाला अद्यापही जाग आलेली नाही. यामुळे कृष्णानगर परिसरातील रहिवासी पीएमपी बससेवेपासून वंचित आहे.
राज्याच्या विविध भागतील नागरिक रोजगारासाठी कृष्णानगर, गणेशनगर, लक्ष्मीनगर, हेवनपार्क परिसरात राहत आहेत. या भागाची लोकसंख्या जवळपास 25 हजारांच्या आसपास आहे. परिसरातील नागरिकांची कामासाठी कोंढवा, वानवडी, स्वारगेट, पुणे स्टेशन आणि हडपसर येथे दररोज ये-जा असते.
तसेच विद्यार्थ्यांना देखील शाळा, महाविद्यालयांत जावे लागत आहे. मात्र सध्या बससेवा उपलब्ध नसल्याने प्रवाशांना खासगी वाहतूक अथवा रिक्षाने साळुंखे विहार किंवा तरवडेवस्ती येथे जावून बस पकडावी लागत आहे. सर्वसामान्य घरांतील विद्यार्थी अनेकवेळा रस्त्यावर उभे राहून दुचाकीस्वारांकडे लिफ्ट मागत असल्याचे चित्र दिसून येत आहे. तरीही पीएमपी प्रशासनाला जाग का येत नाही, असा सवाल नागरिकांकडून उपस्थित केला जात आहे.
पीएमपीकडून प्रवाशांची हेळसांड
तत्कालीन महापौर प्रशांत जगताप यांनी कृष्णानगर परिसरातील नागरिक आणि विद्यार्थांसाठी पीएमपी बससेवा उपल्बध करुन दिली होती. यामुळे विद्यार्थी आणि नागरिकांची सोय झाली होती. परंतू गेल्या पाच वर्षांपासून पीएमपी प्रशासनाने या मार्गावरील बससेवा बंद केली आहे.
महंमदवाडी स्मशानभूमीपासून हेवनपार्कदरम्यान जागोजागी उभारलेले बसथांबे प्रशासनाने गायब केले. पीएमपीच्या आधिकार्यांनी कृष्णानगर मार्गाचा सर्वे करु करून बससेवा सुरू करण्याचे आश्वासन दिले होते. मात्र त्यावर अद्यापही कार्यवाही झाली नसल्याने परिसरातील प्रवाशांची पीएमपीकडून हेळसांड सुरू असल्याचे नागरिकांनी सांगितले.
कृष्णानगर परिसरातील पीएमपी बससेवा सुरु करण्यासाठी प्रशासनाकडे पाठपुरावा केला जात आहे. प्रशासनाने या ठिकाणी तातडीने बससेवा सुरू करून नागरिक आणि विद्यार्थ्यांची गैरसोय दूर करावी.
- अतुल तरवडे, सामाजिक कार्यकर्ते
महंमदवाडी-हडपसर मार्गावर मिनिटाला पीएमपीची बस उपलब्ध आहेत. कृष्णानगर मार्गाबाबत माहिती घेवून सांगतो.
- सतिश गव्हाणे, अधिकारी, पीएमपी
