Fake Astrologer Fraud Pune
पुणे: कोथरूड येथील एका तरुणाला स्वतःचे भविष्य पाहणे चांगलेच महागात पडले आहे. एका ठगाने त्याला भविष्य सांगणे तसेच जीवनातील अडीअडचणी दूर करतो, असे प्रलोभन दाखवत तरुणाच्या बोटातील 60 हजारांची सोन्याची अंगठी हातचलाखीने लंपास केल्याची घटना नारायण पेठेत घडली आहे.
याप्रकरणी रामबाग कॉलनी कोथरूड येथील एका 34 वर्षीय तरुणाने विश्रामबाग पोलिस ठाण्यात फिर्याद दिली आहे. त्यानुसार पोलिसांनी अज्ञात ठगाविरुद्ध गुन्हा दाखल केला आहे. हा प्रकार शुक्रवारी (दि. 4) दुपारी दीड ते दोन वाजताच्या सुमारास घडला आहे. (Latest Pune News)
पोलिसांनी दिलेल्या माहितीनुसार, नारायण पेठेतील श्री माणकेश्वर विष्णू मंदिराच्या परिसरात चोरटा (ठग) थांबला होता. फिर्यादी तरुण कोथरूडमधील रामबाग कॉलनीत राहायला आहे. तेथून जात असलेल्या तरुणाने चोरट्याला पाहिले. चोरटा तेथून जाणार्या नागरिकांकडे भविष्य सांगण्याची बतावणी करीत होता.
तक्रारदार तरुण चोरट्याजवळ गेला. चोरट्याने त्याला जीवनात येणार्या अडीअडचणी दूर करतो तसेच भविष्य सांगण्याची बतावणी केली. त्यानंतर चोरट्याने तरुणाला बोटातील अंगठी दाखविण्यास सांगितले.
चोरट्याने त्याच्या बोटातील अंगठी काढून देण्यास सांगितले. चोरट्याने बोटातील अंगठी काढल्यानंतर ती तोंडात टाकण्याचा बहाणा केला. तरुणाने त्याला अंगठी परत मागितली. अंगठी तुझ्या घरी कागदात गुंडाळून येईल, अशी बतावणी केली. त्यानंतर चोरटा तेथून पसार झाला. फसवणूक झाल्याचे लक्षात आल्यानंतर तरुणाने पोलिसांकडे तक्रार दिली. पोलिस उपनिरीक्षक पाटील तपास करत आहेत.
