भामा आसखेड : मटण शॉपचा मालक व कामगार यांच्यातील भांडण सोडविण्यासाठी गेलेले कोरेगाव खुर्द (ता.खेड) गावचे माजी उपसरपंच राजू झांबरे यांचेसह शरद बुट्टे व जालिंदर थोरात या तिघांना दोघांनी दांडक्याने जबर मारहाण केली. यात ते जबर जखमी झाले आहेत. ही घटना कोरेगाव खुर्द हद्दीतील कॉर्निंग इंडिया कंपनीच्या समोर बुधवारी (दि.18) रात्री घडली.
कोरेगाव खुर्द गावच्या सरपंच सीमा झांबरे यांचे पती व गावचे माजी उपसरपंच राजू झांबरे, तसेच कोरेगावचे शरद बुट्टे हे दोघे जालिंदर थोरात यांच्या पान टपरीवर थांबले होते. जवळच मटणाचे दुकान आहे. त्याचा मालक व कामगार यांच्यात भांडण सुरू होते. मालक कामगाराला बेदम मारहाण करीत होता. कामगाराचा आवाज ऐकून राजू झांबरे, शरद बुटे व जालिंदर थोरात यांनी भांडण सोडविण्याचा प्रयत्न केला.
यावर भांडण करणाऱ्या दोघांनी दांडके राजू झांबरे यांच्या डोक्यात घातले. त्यानंतर त्या दोघांनी बुट्टे यांनाही मारहाण केली. जालिंदर थोरात यांनाही मारले. यात कोरेगाव खुर्द गावच्या हद्दीत डुकराचा कत्तलखाना आहे. रविवारी वासुली फाटा येथे मोठा आठवडा बाजार भरतो. यात परप्रांतीय कामगारांकडून डुकराच्या मटणाला मोठी मागणी असते.
हे गाव एमआयडीसी उत्तर पोलिस ठाणे हद्दीत आहे. याबाबतची तक्रारदारांच्या फियार्दीनुसार गुन्हा दाखल करण्यात येणार असल्याचे एमआयडीसी उत्तर पोलिस ठाण्याचे निरीक्षक दिगंबर सूर्यवंशी यांनी सांगितले.
