खडकवासला: खडकवासला धरण परिसराला शुक्रवारी (दि. 19) पहाटे मुसळधार पावसाने झोडपले. धरणसाखळीतील चारही धरणे ‘ओव्हर फ्लो’ झाल्याने सकाळी आठ वाजता खडकवासला धरणातून मुठा नदीत 6 हजार 843 क्युसेकने विसर्ग सोडण्यात आला. धरणक्षेत्रात जोरदार पाऊस पडल्यास जादा पाणी मुठा नदीत सोडण्यात येणार आहे. त्यामुळे नदीकाठच्या रहिवाशांना प्रशासनाने सतर्कतेचा इशारा दिला आहे.
पानशेत, वरसगाव खोऱ्यात मात्र पावसाचा जोर कमी आहे. अधूनमधून पडणाऱ्या जोरदार सरींमुळे वरसगावच्या विसर्गात वाढ करण्यात आली आहे. सध्या वरसगावमधून 1 हजार 344 व पानशेतमधून 600 क्युसेकने पाणी सोडले जात आहे. (Latest Pune News)
गुरुवार(दि. 18) सकाळी सहा ते शुक्रवार सकाळी सहा वाजेपर्यंतच्या 24 तासांत खडकवासला येथे 70 मिलिमीटर पाऊस पडला. पानशेत येथे 21, वरसगावला 20 व टेमघर येथे 56 मिलिमीटर पाऊस पडला. पहाटे चार ते पाच या एका तासात खडकवासला परिसरात धो-धो पाऊस पडला.
खडकवासला धरण शाखेच्या शाखा अभियंता गिरीजा कल्याणकर-फुटाणे म्हणाल्या की, धरणसाखळी शंभर टक्के भरून वाहत असल्याने जादा पाणी मुठा नदीत सोडले जात आहे. पावसामुळे पाण्याची आवक वाढल्यास मुठेच्या विसर्गात वाढ करण्यात येणार आहे.
खडकवासला धरणसाखळी
एकूण पाणी साठवणक्षमता 29.15 टीएमसी
सोमवारचा पाणीसाठा
29.15 टीएमसी (100 टक्के)
