पुणे: जम्मू-काश्मीर येथील शोपियां या बाजार समितीमधून ई-नामद्वारे येथील पुणे कृषी उत्पन्न बाजार समितीमधील व्यापारी सुयोग सूर्यकांत झेंडे (श्री गुरुदेवदत्त एजन्सी) यांनी सफरचंद व पिअर या दोन शेतमालाची खरेदी केली. याप्रमाणे एकूण 11.6 टन शेतमालाची खरेदी केली असून या खरेदीची किंमत 11.76 लाख रुपये असल्याचे राज्य कृषी पणन मंडळाकडून सांगण्यात आले.
ई-नाम इंटरस्टेट ट्रेडअंतर्गत दोन राज्यातील बाजार समित्यांमध्ये ई-लिलावाद्वारे शेतमालाची खरेदी-विक्रीकरता येते. इंटरस्टेट ट्रेडला चालना देण्यासाठी पणनमंत्री जयकुमार रावल आग्रही आहेत. त्यांच्या मार्गदर्शनाखाली जम्मू-काश्मीर येथील सफरचंद, पिअर व प्लम या शेतमालाची ई-नाममार्फत इंटरस्टेट ट्रेड करण्याबाबत कार्यवाही सुरू होती. त्याप्रमाणे पहिल्यांदा 5 ऑगस्ट 2025 रोजी पुण्यात या शेतमालाचा व्यापार झाला आहे.
ई-नाममुळे जम्मू-काश्मीर येथील बाजार समित्या व पुणे बाजार समिती यांच्यामध्ये नव्याने खरेदीची व्यवस्था कार्यान्वित झाली आहे. जम्मू -काश्मीरप्रमाणे इतर राज्यांतील शेतमाल ई-नामद्वारे खरेदी-विक्रीबाबत कार्यवाही सुरू असल्याचे पणन मंडळाचे सरव्यवस्थापक विनायक कोकरे यांनी सागितले.
21 हजार 582 कोटींची उलाढाल
केंद्र शासनाने शेतमालाच्या खरेदी- विक्रीसाठी देशपातळीवर एक बाजार या संकल्पनेवर आधारित राष्ट्रीय कृषी बाजार (ई-नाम) ही योजना सुरू केली आहे. महाराष्ट्रासह 23 राज्यांतील तसेच 4 केंद्रशासीत
प्रदेशातील मिळून देशातील 1522 बाजार समित्या ई-नामला जोडल्या आहेत. यामध्ये महाराष्ट्रातील 133 बाजार समित्या चार टप्प्यांमध्ये ई-नामला जोडल्या आहेत. राज्यात ई-नामद्वारे एकूण 578 लाख क्विं. शेतमालाची विक्री झाली असून याची किंमत 21 हजार 582 कोटी रुपये आहे.
कृषी उत्पन्न बाजार समित्यांमध्ये शेतमालाच्या ई-नामद्वारे होणार्या शेतमाल व्यापारातील विक्रीची रक्कम अडत्यांमार्फत थेट ई-पेमेंटद्वारे करण्याची सुविधा समाविष्ट आहे. त्यामुळे शेतमालाची ऑनलाइन व्यापार-व्यवहारात अधिक पारदर्शकता आली असून राज्यांतर्गत व्यापार वाढीस चालना मिळाली आहे. ई-लिलावाद्वारे सोयाबीन, हरभरा, मका, गहू, ज्वारी, हळद, तूर, उडीद, कांदा, डाळिंब, कोबी, रेशीमकोष आणि फळांची विक्री होत आहे. त्यामुळे राज्यातील ई-नाम बाजार समित्यामधील व्यापारी व शेतकर्यांनी आंतरराज्यीय व्यापारामध्ये जास्तीत जास्त सहभाग घ्यावा.
- संजय कदम, कार्यकारी संचालक, राज्य कृषी पणन मंडळ,पुणे.
