पुणे: आगामी स्थानिक स्वराज्य संस्था निवडणूक आचारसंहिता लक्षात घेता सर्व कार्यान्वित यंत्रणांनी जिल्हा वार्षिक योजना सन 2025-26 अंतर्गत प्रस्तावित कामांना 25 जूनपर्यंत प्रशासकीय मान्यता घेऊन 31 जुलै 2025 च्या आत प्रस्तावित कामे सुरू करावीत, असे निर्देश जिल्हाधिकारी जितेंद्र डुडी यांनी दिल्या.
जिल्हाधिकारी कार्यालयात आयोजित जिल्हा वार्षिक योजना आढावा बैठकीत डुडी बोलत होते. या वेळी जिल्हा परिषद मुख्य कार्यकारी अधिकारी गजाजन पाटील, जिल्हा नियोजन अधिकारी किरण इंदलकर उपस्थित होते. (Latest Pune News)
डुडी म्हणाले, जिल्ह्यातील सर्व कार्यान्वित यंत्रणांनी आपले प्रस्तावास तत्काळ तांत्रिक मान्यता घ्यावी व 25 जूनपूर्वी प्रशासकीय मान्यता घेऊन सर्व प्रस्तावित कामे 31 जुलै 2025 च्या आत सुरू करावीत, डिसेंबर 2025 अखेर सर्व कामे पूर्ण करावीत. वरिष्ठ स्तरावरून घ्यावयाच्या मान्यतांसंदर्भात पाठपुराव्याकरिता यंत्रणांना आवश्यक सहकार्य करण्यात येईल, असेही त्यांनी सांगितले.
तसेच, जिल्हा वार्षिक योजनेतंर्गत ’नावीन्यपूर्ण योजना ’यामध्ये नावीन्यपूर्ण कामांचे प्रस्ताव जिल्हा नियोजन शाखेत तत्काळ सादर करावेत. या संदर्भात कृषी, महिला व बालविकास, कौशल्य विकास रोजगार उद्योजकता नावीन्यपूर्ण विभाग, शिक्षण, पोलिस आदी विभागांनी नावीन्यपूर्ण योजनेअंतर्गत निधीची मागणी नोंदवून प्रस्ताव सादर करावेत, असे त्यांनी सांगितले.
या बैठकीनंतर राज्य शासनाच्या दहा कोटी वृक्ष लागवड कार्यक्रमांतर्गत पुणे जिल्ह्यासाठी एक कोटीचे उद्दिष्ट देण्यात आले असून यामध्ये सर्व विभागांनी आपापला सहभाग नोंदवून जास्तीत जास्त वृक्षांची लागवड करावी, अशा सूचना जिल्हाधिकारी डुडी यांनी दिल्या.
