पुणे: कर्जाला कंटाळून 42 वर्षीय फळविक्रेत्याने त्याच्या 40 वर्षीय पत्नीचा गळा आवळून खून केला. त्यानंतर स्वत: गळफास घेऊन आत्महत्या केल्याची घटना मांजरी खुर्द परिसरात घडली. आत्महत्येपूर्वी संबंधित तरुणाने मोबाईलमध्ये व्हॉईस रेकॉर्ड करून मी खूप कर्जबाजारी झालो आहे, पैशांची ताणाताण सुरू असल्याचे नमूद केले. त्यानंतर त्याने पत्नीचा गळा आवळून खून करीत स्वतः गळफास घेतला.
उज्ज्वला वारुळे (वय 40) असे खून केलेल्या महिलेचे नाव आहे. नागनाथ वारुळे (वय 42) असे आत्महत्या केलेल्याचे नाव आहे. याप्रकरणी पोलिस अमलदार वैजिनाथ केदार यांनी वाघोली पोलिस ठाण्यात फिर्याद दाखल केली आहे. (Latest Pune News)
पोलिसांनी दिलेल्या माहितीनुसार, मूळचे तुळजापूरचे असलेले वारुळे दाम्पत्य काही महिन्यांपासून मांजरी खुर्द परिसरात कामाला होते. कामधंदा मिळत नसल्याने दोघांनी फळांची विक्री करण्यास सुरुवात केली. यादरम्यान नागनाथवर कर्ज झाल्यामुळे तो तणावग्रस्त झाला होता. त्याच ताणातून त्याने स्वतःच्या मोबाईलमध्ये व्हॉईस रेकॉर्ड केले.
माझ्यावर कर्ज खूप झाले, पैशांची ताणताणी झाल्यामुळे आत्महत्या करीत असल्याचे त्याने रेकॉर्डमध्ये नमूद केले. त्यानंतर त्याने पत्नीचा गळा आवळून खून केला. स्वतः बांधकाम सुरू असलेल्या इमारतीला गळफास घेऊन आत्महत्या केली.
दरम्यान, सकाळच्या सुमारास परिसरात फिरण्यासाठी गेलेल्या नागरिकांना एक जण दोरीला लटकत असल्याचे दिसून आले. त्यानंतर त्यांनी पोलिस नियंत्रण कक्षाला फोन करून माहिती दिली. घटनास्थळी वरिष्ठ अधिकार्यांसह वाघोली पोलिसांनी धाव घेतली. याप्रकरणी पोलिस उपनिरीक्षक मनोज बागल तपास करीत आहेत.
