पुणे : ग्रामीण भागातील 9 ते 14 वयोगटातील मुलींना गर्भाशयाच्या मुखाच्या कर्करोगावरील प्रतिबंधासाठी एचपीव्ही लस दिली जाणार आहे. यासंदर्भात ‘जीविका फाउंडेशन’सोबत करार करण्यात आला आहे, अशी माहिती जिल्हा परिषदेचे मुख्य कार्यकारी अधिकारी गजानन पाटील यांनी दिली. (Latest Pune News)
पुणे जिल्हा परिषदेने ‘जीविका फाउंडेशन’सोबत ‘सर्व्हायकलमुक्त पुणे’ या सर्वसमावेशक आरोग्य उपक्रमासाठी सामंजस्य करार केला आहे. या करारावर जिल्हा परिषदेचे मुख्य कार्यकारी अधिकारी गजानन पाटील आणि जीविका फाउंडेशनचे संचालक जिग्नेश पटेल यांनी स्वाक्षरी केली. या कराराच्या माध्यमातून 9 ते 14 वयोगटातील सर्व मुलींना गर्भाशयाच्या मुखाच्या कर्करोगावरील प्रतिबंधासाठी एचपीव्ही लस विनामूल्य दिली जाणार आहे. तसेच, सर्व अविवाहित महिलांची तोंड, स्तन आणि गर्भाशयाच्या मुखाच्या कर्करोगाची तपासणी केली जाणार आहे. त्यामुळे आजाराचे लवकर निदान होऊन योग्य वेळी उपचार करणे शक्य होणार आहे. पाटील म्हणाले, ‘हा उपक्रम ग्रामीण भागातील महिलांच्या आरोग्यासाठी तसेच कर्करोग प्रतिबंधासाठी एक महत्त्वपूर्ण पाऊल आहे.
हा उपक्रम शासनाच्या प्रतिबंधात्मक आरोग्य धोरणांना आणि जनजागृतीच्या उद्दिष्टांना पूरक आहे. या उपक्रमाचा किशोरवयीन मुली आणि महिलांना निश्चितच फायदा होईल. पुणे जिल्हा कर्करोगमुक्त आणि आरोग्यदायी भविष्याच्या दिशेने वाटचाल करेल,’ असा विश्वास त्यांनी व्यक्त केला.
दिवाळीनंतर या उपक्रमाला सुरुवात होणार आहे. ही कर्करोग प्रतिबंधक लस घेणे ऐच्छिक असणार असून, त्यापूर्वी पालकांची संमती घेण्यात येणार आहे. जिल्ह्यातील 9 ते 14 वर्षांतील सर्व मुलींना मार्च 2026 पर्यंत ही लस दिली जाणार आहे, असा विश्वासही त्यांनी या वेळी व्यक्त केला. या वयोगटातील जिल्हा परिषदेच्या शाळांमध्ये शिकणाऱ्या साधारणतः 35 हजार मुली आहेत. या सर्व मुलींना लसीचे दोन डोस दिले जाणार आहेत. या लसीचे कोणतेही दुष्परिणाम होत नसल्याचे सिद्ध झाले आहे.
