पुणे: राज्यात गेल्या काही दिवसांपासून सुरू असलेला मुसळधार पाऊस कमी झाला आहे. तरी देखील कोकण, मध्य महाराष्ट्रात काही ठिकाणी मुसळधार, मराठवाड्यात हलका ते मध्यम तर विदर्भात वादळी वार्यायासह पाऊस पडणार आहे.
राज्यात जून महिन्याच्या पहिल्या टप्प्यात सलग मुसळधार ते अतिमुसळधार पावसाने हजेरी लावली. दरम्यान, मागील चार ते पाच दिवसांपासून घाटमाथा, कोकणातील काही जिल्हे वगळता उर्वरित जिल्ह्यात पाऊस कमी झाला आहे. त्यामुळे आता पुन्हा ऊन पडू लागले आहे. (Latest Pune News)
हवामान विभागाने दिलेल्या माहितीनुसार, सध्या हवेच्या वरच्या भागात बंगालच्या उपसागरापासून ते आंध्र प्रदेशाची किनारपट्टी पुढे दक्षिण ओडिसापर्यंत हवेच्या वरच्या भागात चक्रीय स्थिती कार्यरत आहे. यामुळे कोकण, सातारा, पुणे, कोल्हापूर, नाशिक या घाटमाथ्यासह विदर्भात काही ठिकाणी मुसळधार पाऊस पडेल, असा अंदाज वर्तविण्यात आला आहे.
मान्सून पोहचला जम्मूपर्यंत
मान्सूनने 95 ते 97 टक्के भारत व्यापला आहे. येत्या दोन दिवसांत उत्तर अरबी समुद्र, राजस्थानचा काही भाग, पंजाब, हरियाणा, छत्तीसगड, दिल्ली, पश्चिम उत्तर प्रदेश, हिमाचल प्रदेश, जम्मू हा भाग व्यापणार आहे.
...असे आहेत अलर्ट
यलो अलर्ट : पालघर, ठाणे, मुंबई, सिंधुदुर्ग, नंदुरबार, जळगाव, नाशिक, नाशिक घाटमाथा, पुणे घाटमाथा, कोल्हापूर घाटमाथा, सातारा घाटमाथा, छत्रपती संभाजीनगर, जालना, परभणी, हिंगोली, नांदेड, अकोला, अमरावती, भंडारा, बुलढाणा, गडचिरोली, गोंदिया, नागपूर, वर्धा, वाशिम, यवतमाळ.
ऑरेंज अलर्ट : रायगड.
