पुणे: शहर, पिंपरी चिंचवडसह जिल्ह्यात सलग दुसर्या दिवशी जोरदार पाऊस झाला. पिंपरी चिंचवड भागात मंगळवारी (दि.20) यंदाच्या हंगामातील सर्वाधिक 101 मि.मी. पाऊस एकाच दिवसात झाल्याने तेथे अतिवृष्टीची नोंद झाली. तर पुणे शहरात 40 तर जिल्ह्यातही सर्वंच भागात दमदार पावसाने हजेरी लावली.
पुणे शहर, पिंपरी चिंचवड आणि जिल्ह्याला मंगळवारी पावसाने अक्षरशः झोपडून काढले. सर्वाधिक पाऊस पिंपरी चिंचवड भागात 101 मि.मी. तर जिल्ह्यातील लोणावळा, हवेली, गिरीवन, माळीण पुरंदर भागातही जोरदार पाऊस झाला. बुधवारीही जिल्ह्यात, विशेषत: ग्रामीण भागात पावसाचा जोर कायम होता. (Latest Pune News)
बुधवारी दिवसभरात पुणे शहरातील काही भागांत रिमझिम पाऊस झाला. फक्त एनडीए भागात 20 मि.मी. इतका जास्त पाऊस झाला होता. बुधवारी त्याने विश्रांती घेतली, असे वाटत असताना रात्री 8.45 च्या सुमारास पुन्हा जोरदार पावसाला सुरुवात झाली. विजांच्या कडकडाटांसह सर्वच भागांत पावसाला सुरुवात झाली. पाषाण, बाणेर भागात पावसाचा जोर जास्त होता.
मंगळवारी जिल्ह्यात झालेला पाऊस:
चिंचवड 101 मि.मी
तळेगाव ढमढेरे 85.5 मि.मी
हडपसर 76 मि.मी
डुडुळगाव 70.5 मि.मी
वडगाशेरी 67 मि.मी
एनडीए 65.5 मि.मी
लोणावळा 56.5 मि.मी
पाषाण 54 मि.मी
हवेली 49 मि.मी
तळेगाव 44 मि.मी
गिरीवन 42 मि.मी
शिवाजीनगर 40.5 मि.मी
लवळे 35.5 मि.मी
राजगुरुनगर 29 मि.मी
माळीण 28 मि.मी
कोरेगाव पार्क 28 मि.मी
नारायणगाव 28 मि.मी
पुरंदर 17.5 मि.मी
निमगिरी 12.5 मि.मी
बालेवाडी 6 मि.मी
भोर 6 मि.मी
बारमती 5 मि.मी
राज्यातील कोकण, मध्य महाराष्ट्र आणि विदर्भ या भागात अवकाळी पावसाचे थैमान सुरूच राहील. मात्र, मराठवाड्यातील काही जिल्हे वगळता उर्वरित भागात पावसाचे प्रमाण कमी झाले आहे. पुणे वेधशाळेच्या हवामान विभागाचे माजी विभागप्रमुख डॉ. अनुपम कश्यपी यांनी सांगितले की, पुणे, सातारा, कोल्हापूर घाटमाथ्यावर तसेच रायगड, रत्नागिरी, सिंधुदुर्ग येथे 21 ते 23 मेदरम्यान अतिवृष्टीची शक्यता आहे.
त्यामुळे या भागाला तीन दिवस ऑरेंज अलर्ट देण्यात आला आहे. उत्तर कर्नाटक-गोवा किनारपट्टीलगत बुधवारी रात्री कमी दाबाचा पट्टा तयार झाला. जो पुढील 48 तासांत उत्तर दिशेने सरकत जाऊन गुरुवारच्या रात्रीपर्यंत तो हळूहळू मजबूत होऊन एक तीव— कमी दाबाचा पट्टा तयार होण्याची शक्यता आहे. कोकणात (मुंबईसह) मुसळधार ते अतिमुसळधार पावसाची शक्यता असून, नाशिक, अहिल्यानगर, धुळे, जळगाव, नंदुरबार या भागांमध्येही जोरदार पावसाची शक्यता आहे.
मान्सून देशाच्या सीमेवर येऊन ठेपला
मान्सून श्रीलंका, मालदीव ओलांडून बुधवारी (दि. 21) देशाच्या सीमेवर आला. आता तो कधीही केरळ आणि कर्नाटकात येईल, अशी स्थिती आहे. मात्र, हवामान विभागाच्या अंदाजानुसार मान्सून 25 मेपर्यंत केरळात येईल. पुढील 6 ते 7 दिवसांत पश्चिम किनार्यावर (गुजरात, कोकण आणि गोवा, कर्नाटक आणि केरळ) या भागांत मुसळधार ते अतिमुसळधार पाऊस पडण्याची शक्यता आहे.
