पुणे: जिल्ह्यासह राज्यभरात काही ठिकाणी अवकाळी पावसाने हजेरी लावली आहे, तर काही ठिकाणी उन्हाळ्यामुळे पाणीटंचाई निर्माण झाल्यामुळे उत्पादन घटले आहे. परिणामी, मार्केट यार्डात फळभाज्यांची आवक रोडावली आहे. रविवारी (दि. 11) राज्याच्या विविध भागांसह परराज्यांतून सुमारे 80 ट्रक फळभाज्यांची आवक झाली. बाजारात दाखल झालेल्या मालाच्या तुलनेत मागणी वाढल्याने फ्लॉवर, ढोबळी मिरची, शेवगा आणि गाजराच्या भावात 10 ते 20 टक्क्यांनी वाढ झाली आहे.
बाजारात दाखल झालेल्या मालाच्या तुलनेत मागणी कमी राहिल्याने तोतापुरी कैरीच्या भावात दहा टक्क्यांनी घसरण झाली. मागणी आणि पुरवठा यातील समतोलामुळे उर्वरित फळभाज्यांचे भाव मागील आठवड्याच्या तुलनेत स्थिर होते. दरम्यान भारत पाकिस्तान युध्द परिस्थितीचा कसलाही परिणाम फळभाज्यांच्या आवकवर झालेला नाही. (latest pune news)
परराज्यांतून कर्नाटक, गुजरात आणि मध्यप्रदेश येथून हिरवी मिरची सुमारे 14 ते 15 टेम्पो, कर्नाटक आणि गुजरात येथून कोबी 4 ते 5 टेम्पो, आंध्र प्रदेश आणि तामिळनाडू येथून शेवगा 3 ते 4 टेम्पो, कर्नाटक आणि गुजरात येथून घेवडा 2 ते 3 टेम्पो, कर्नाटक येथून 1 टेम्पो भुईमुग शेंग, हिमाचल प्रदेश 5 टेम्पो मटार, कर्नाटक येथून पावटा 2 टेम्पो, आंध्र प्रदेश आणि तामिळनाडू येथून कैरी 6 ते 7 टेम्पो, मध्य प्रदेश येथून लसणाची सुमारे 12 ते 13 टेम्पो, तर इंदौर, आग्रा, स्थानिक भागातून मिळून बटाट्याची 30 टेम्पो इतकी आवक झाली.
स्थानिक भागातून सातारी आले सुमारे 550 ते 600 गोणी, भेंडी 6 ते 7 टेम्पो, गवार 3 ते 4 टेम्पो, टोमॅटो 7 ते 8 हजार पेटी, हिरवी मिरची 3 ते 4 टेम्पो, काकडी 7 ते 8 टेम्पो, फ्लॉवर 8 ते 10 टेम्पो, कोबी 5 ते 6 टेम्पो, ढोबळी मिरची 7 ते 8 टेम्पो, शेवगा 2 टेम्पो, गाजर 4 ते 5 टेम्पो, भुईमुंग शेंग 50 ते 60 गोणी, तांबडा भोपळा 14 ते 15 टेम्पो, कांदा सुमारे 75 ते 80 टेम्पो इतकी आवक झाली होती.
कोथिंबीर, शेपू, करडई, पुदिना स्वस्त
पालेभाज्यांची आवक मागील आठवड्याच्या तुलनेत स्थिर आहे. त्या तुलनेत मागणी कमी असल्यामुळे घाऊक बाजारात कोथिंबिरीच्या भावात जुडीमागे सर्वाधिक 5 रुपयांनी घट झाली आहे, तर त्याखालोखाल शेपूच्या भावात 3 रुपये आणि करडई, पुदिनाच्या भावात प्रत्येकी 1 रुपयांनी घट झाली आहे.
मागणी आणि पुरवठा यातील समतोलामुळे उर्वरित पालेभाज्यांचे भाव मागील आठवड्याच्या तुलनेत स्थिर असल्याची माहिती अडतदार अमोल घुले यांनी दिली. गुलटेकडी मार्केट यार्डातील घाऊक बाजारात रविवारी (दि. 11) कोथिंबिरीची सुमारे 1 लाख जुडींची आवक झाली.
ही आवक मागील आठवड्याच्या तुलनेत स्थिर आहे. मेथीच्या आवकेमध्ये किंचितशी घट झाली आहे. मागील आठवड्यात 35 हजार जुडी आवक असलेल्या मेथीची रविवारी 30 हजार जुडी आवक नोंदविण्यात आली. कोथिंबिरीला घाऊक बाजारात जुडीला 10 ते 20 रुपये मोजावे लागत आहेत.
