पुणे : पुढारी वृत्तसेवा
गिरिप्रेमीच्या 40 व्या वर्षपूर्तीनिमित्त संस्थेच्या गिर्यारोहकांनी सह्याद्रीतील 40 विविध सुळक्यांवर प्रस्तरारोहण करत आरोहण करण्याचा संकल्प सोडला आहे. यातील 25 सुळक्यांवर गेल्या दोन आठवड्यांमध्ये चढाई करण्यात संघाच्या सदस्यांनी यश मिळविले.
यामध्ये एव्हरेस्ट शिखरवीर कृष्णा ढोकले यांच्या नेतृत्वाखालील संघाने रायगड, ठाणे, पालघर जिल्ह्यातील सुधागड, पाली, सरसगड, चंदेरी, बदलापूर, पालघर इत्यादी ठिकाणी असलेल्या विविध 24 सुळक्यांवर आरोहण केले. 50 ते 250 फूट उंच असलेल्या सुळक्यांचा यात समावेश होता. याचसोबत गिरिप्रेमीच्या दुसर्या संघाने नाशिकजवळील डांग्या सुळक्यावर यशस्वी चढाई केली. या संघात डॉ. सुमित मांदळे, भूषण शेट, वरुण भागवत व रोहन देसाई यांचा समावेश होता.
कृष्णा ढोकले यांच्या संघात सचिन शाह, राजेंद्र मोरे व ओंकार बुर्डे यांचा समावेश होता. प्रत्यक्ष चढाईदरम्यान नवीन मार्ग शोधणे, मार्गातील निखळणारे दगड, अंगावर येणारे कडे, निसरडी माती, दोर लावण्यासाठी कमी जागा अशा नैसर्गिक आव्हानांचा सामना केला. कोरडे व उष्ण हवामान यांचा देखील अडथळा पार करत संघाने 24 सुळक्यांवर चढाई केली. यातील 21 सुळक्यांवर ढोकले यांनी चढाई केली.
आतापर्यंत ढोकले यांनी 100 सुळक्यांवर यशस्वी चढाई करण्याचा नवा विक्रम प्रस्थापित केला आहे. श्री शिव छत्रपती पुरस्कार विजेते गिर्यारोहक उमेश झिरपे यांच्या मार्गदर्शनाखाली गिरिप्रेमी संस्थेतील गिर्यारोहक प्रस्तरारोहणाचे आव्हान स्वीकारत आहेत. येत्या काळात 40 सुळक्यांवरील आरोहण पूर्ण करण्याचे ध्येय संस्थेने ठेवले आहे.
