Gargi Jadhav SMA Treatment: पुण्यातील वाघोली येथील अवघ्या एक वर्षाच्या गार्गी संदीप जाधव हिच्या उपचारांसाठी आवश्यक असलेला १० कोटी रुपयांचा निधी अखेर जमा झाला आहे. ‘SMA Type 1’ या दुर्मिळ आणि गंभीर आजाराशी लढणाऱ्या गार्गीच्या मदतीसाठी अनेकांनी हात पुढे केला. नागरिकांच्या मदतीमुळे १९ ऑक्टोबर रोजी निधी उभारणीचे उद्दिष्ट पूर्ण झाले. त्यामुळे आता गार्गीवर लवकरच उपचार सुरू होण्याची आशा निर्माण झाली आहे.
गार्गीला ‘स्पायनल मस्क्युलर अ‍ॅट्रॉफी’ (SMA Type 1) हा गंभीर आजार झाला आहे. या आजारामुळे शरीराच्या स्नायूंवर परिणाम होतो. गार्गीच्या उपचारांसाठी ‘झोल्गेन्स्मा’ (Zolgensma) हे महागडे इंजेक्शन देण्याची गरज आहे. या उपचारांसाठी सुमारे १० ते ११ कोटी रुपयांचा खर्च अपेक्षित होता. एवढी मोठी रक्कम उभी करण्याचे आव्हान गार्गीच्या कुटुंबासमोर होते.
गार्गीचा जीव वाचवण्यासाठी तिच्या कुटुंबीयांनी १ ऑगस्ट रोजी नागरिकांना आर्थिक मदतीचे आवाहन केले होते. त्यानंतर सोशल मीडियाच्या माध्यमातून मदतीची मोहीम सुरू झाली. अनेक संस्था, सामाजिक कार्यकर्ते, सोशल मीडिया इन्फ्लुएन्सर्स आणि सामान्य नागरिक या मोहिमेत सहभागी झाले. प्रत्येकाने आपल्या परीने मदत केली. हळूहळू निधी जमा होत गेला आणि अखेर १९ ऑक्टोबर रोजी १० कोटी रुपयांचे उद्दिष्ट पूर्ण झाले.
या मोहिमेला प्रसिद्ध नृत्यांगना गौतमी पाटील हिनेही मदतीचा हात दिला होता. तिने सोशल मीडियावर व्हिडिओ शेअर करून गार्गीच्या उपचारांसाठी सढळ हाताने मदत करण्याचे भावनिक आवाहन केले होते. तिच्यासह अनेकांनी ही मोहीम जास्तीत जास्त लोकांपर्यंत पोहोचवण्याचा प्रयत्न केला. त्यामुळे गार्गीच्या उपचारांसाठी निधी उभारण्याच्या मोहिमेला मोठा प्रतिसाद मिळाला.
या कठीण काळात गार्गीची आई आणि तिच्या कुटुंबीयांनी निधी उभारण्यासाठी अथक प्रयत्न केले. वेळेत उपचार सुरू व्हावेत, यासाठी त्यांनी शक्य ते सर्व प्रयत्न केले. दुसरीकडे, गार्गीला नवजीवन मिळावे या आशेने अनेक नागरिकांनी आर्थिक मदत केली. लहान-मोठ्या देणग्यांमधून जमा झालेल्या निधीमुळे कुटुंबाला मोठा दिलासा मिळाला आहे.
निधी उभारणीचे उद्दिष्ट पूर्ण झाल्यानंतर जाधव कुटुंबीयांनी सर्व मदत करणाऱ्यांचे आभार मानले आहेत. “तुमच्या प्रत्येकाच्या लहान-मोठ्या मदतीने, प्रार्थनेने आणि सहकार्याने आम्हाला ही अशक्य वाटणारी गोष्ट शक्य करता आली. या कठीण प्रवासात साथ देणाऱ्या सर्व देणगीदारांचे, हितचिंतकांचे आणि पाठीराख्यांचे आम्ही आयुष्यभर ऋणी राहू,” अशा भावना कुटुंबीयांनी व्यक्त केल्या.
गार्गीच्या उपचारांसाठी १० कोटी रुपयांचा निधी जमा होणे ही तिच्या कुटुंबासाठी मोठी गोष्ट आहे. अनेक अनोळखी व्यक्तींनी मदतीसाठी पुढाकार घेतल्याने या घटनेतून माणुसकीचे दर्शन झाले. आता गार्गीवर लवकरात लवकर उपचार सुरू व्हावेत आणि ती निरोगी आयुष्य जगावी, अशी प्रार्थना तिचे कुटुंबीय आणि मदतीसाठी पुढे आलेले नागरिक करत आहेत.
