शिक्रापूर (ता. शिरूर); पुढारी वृत्तसेवा : शिक्रापूर येथील मलठण फाटा परिसरात गुरुवारी (दि. 19) पहाटेच्या सुमारास पोलिस अधिकार्याचा गणवेश परिधान करून फिरणार्या तोतया पोलिस अधिकार्याला शिक्रापूर पोलिसांनी अटक केली. चंद्रमणी शशिकांत शेवाळे (वय 19, रा. मेरी मसकड राजवाडा, वक्रतुंड नगर, नाशिक. मूळ रा. जांबूटके, ता. दिंडोरी, जि. नाशिक) असे त्याचे नाव आहे.
मलठण फाटा परिसरातील वाजे गुळाचा चहा येथे गुरुवारी पहाटेच्या सुमारास एक पोलिस अधिकारी संशयितपणे वावरत असल्याची माहिती पोलिस उपनिरीक्षक राजेश माळी यांना मिळाली.
सहायक पोलिस निरीक्षक रणजीत पठारे, पोलिस हवालदार शंकर साळुंके, होमगार्ड सुहास डांगे यांनी या ठिकाणी जाऊन पाहणी केली असता हुबेहूब पोलिस उपनिरीक्षक दर्जाच्या अधिकार्याचा गणवेश व पेहराव धारण केलेला पोलिस अधिकारी दिसून आल्याने पोलिसांनी त्याची चौकशी केली असता तो उडवाउडवीची उत्तरे देऊ लागला.
पोलिसांना त्याच्यावर संशय आल्याने पोलिसांनी त्याची झडती घेतली, त्याच्याजवळ महाराष्ट्र शासन वित्त विभागाचे सहायक सचिव या पदाचे ओळखपत्र मिळून आले. मात्र, तो उडवाउडवीची उत्तरे देत असल्याने तो तोतया पोलिस अधिकारी असल्याचे लक्षात आल्याने पोलिसांनी त्याला ताब्यात घेतले. पोलिस हवालदार शंकर नारायण साळुंके यांनी शिक्रापूर पोलिस स्टेशन येथे फिर्याद दिली असल्याने पोलिसांनी शेवाळे याच्या विरुद्ध गुन्हे दाखल करत त्याला अटक केली. पुढील तपास सहायक पोलिस उपनिरीक्षक मुन्ना मुत्तनवार व पोलिस नाईक रविकिरण जाधव हे करत आहेत.
