पुणे: शहरात मंगळवारी (दि.20) रात्री झालेल्या मुसळधार पावसामुळे विविध भागात झाडे कोसळण्याच्या घटना घडल्या. अग्निशमन दलाच्या जवानांनी तातडीने मदतकार्य करून रस्त्यात पडलेल्या फांद्या, झाडे हटवून रस्ते वाहतुकीस खुले करून दिले. सुदैवाने या घटनेत कोणी जखमी झाले नाही. बुधवारी (दि.21) सकाळपर्यंत शहरातील वेगवेगळ्या भागात 54 ठिकाणी झाडे कोसळली होती.
शहरात मंगळवारी दुपारी पाऊस सुरू झाला. रात्री आठनंतर पावसाचा जोर वाढला. सोसाट्याचा वारा, तसेच पावसामुळे वेगवेगळ्या भागात झाडे कोसळण्याच्या घटना घडल्या. याबाबतची माहिती अग्निशमन दलाला मिळाल्यानंतर जवानांनी घटनास्थळी धाव घेऊन तातडीने मदतकार्य सुरू केले. रस्त्यात पडलेल्या फांद्या, झाडे हटवून जवानांनी रस्ते वाहतुकीस खुले करून दिले. (Latest Pune News)
घोरपडी, धानोरी, कोरेगाव पार्क, येरवडा, एरंडवणे, हडपसर, बावधन, मुकुंदनगर, बिबवेवाडी, सिंहगड रस्ता, वारजे माळवाडी, शंकरशेठ रस्ता, नामदार गोपाळकृष्ण गोखले पथ (फर्ग्युसन रस्ता), कोथरूड, शिवाजीनगर, विश्रांतवाडी भागात झाडे कोसळण्याच्या घटना घडल्या. बुधवारी सकाळी दहा वाजेपर्यंत शहरातील वेगवेगळ्या भागात 54 ठिकाणी झाडे पडण्याच्या घटना घडल्या. सुदैवाने या घटनेत कोणी गंभीर जखमी झाले नाही, अशी माहिती अग्निशमन दलाच्या मुख्य नियंत्रण कक्षाने दिली.
शहरात मंगळवारी झालेल्या पावसामुळे पुणे- सातारा रस्त्यावरील पंचमी हॉटेलजवळ असलेल्या एसटी कॉलनीत पाणी शिरले. तसेच, वारजे परिसरातील चर्च, कोंढव्यातील एनआयबीएम रस्त्यावर असलेल्या अर्चना ग्रीन सोसायटीचे आवार, सहकारनगर भाग एक परिसरातील पॅसफिक हाईट्स सोसायटीच्या आवारात पाणी शिरले. मोटारपंपाचा वापर करून पाण्याचा उपसा करण्यात आला.
सीमाभिंत कोसळली
धनकवडीतील तीन हत्ती चौकात सीमाभिंत कोसळण्याची घटना घडली. तसेच, सिंहगड रस्त्यावरील हिंगणे खुर्द परिसरातील अक्षय कॉम्प्लेक्स इमारतीतील सीमाभिंत कोसळली. अग्निशमन दलाच्या जवानांनी घटनास्थळी धाव घेऊन मदतकार्य केले, अशी माहिती अग्निशमन दलाकडून देण्यात आली.
