सोमेश्वरनगर : पुढारी वृत्तसेवा : वाघळवाडी (ता. बारामती) ग्रामपंचायतीअंतर्गत येणार्या एकाच रस्त्यासाठी शासनाच्या वेगवेगळ्या विभागांतून निधी मंजूर झाला आहे. या कामात लाखो रुपयांचा गैरकारभार झाला असल्याचा प्रकार उघडकीस आला आहे. एका ठिकाणी रस्ता झाला नसतानाही रस्त्याचे काम पूर्ण झाल्याचे दाखवून ठेकेदाराने बिल काढल्याची धक्कादायक बाब समोर आली आहे. एखाद्या चित्रपटाला शोभेल असाच प्रकार वाघळवाडी गावात घडला आहे. यानिमित्ताने मकरंद अनासपुरे यांच्या 'जाऊ तिथे खाऊ' या चित्रपटाची आठवण ग्रामस्थांना येत आहे.
याबाबत ग्रामस्थ चेतनकुमार किसन सकुंडे यांनी शासनाच्या वेगवेगळ्या विभागांतून माहिती अधिकारात माहिती मागवली होती. यामध्ये ही बाब उघड झाली आहे. सार्वजनिक बांधकाम विभाग, जिल्हा परिषदेचा बांधकाम विभाग तसेच ग्रामपंचायतचा चौदावा वित्त आयोग या विभागातून रस्त्यांसाठी लाखो रुपयांचा निधी मंजूर झाला होता. सन 2018 ते 2022 या कालावधीत हा निधी मंजूर करण्यात आला होता. दोन्ही विभागांकडून तसेच चौदाव्या वित्त निधीतून निधी मंजूर होऊन गावातील एकाच रस्त्यासाठी निधी टाकण्यात आला आहे व ते काम पूर्ण होऊन त्याचे बिल संबंधित ठेकेदाराला अदा केले आहे.
एकाच रस्त्यासाठी लाखो रुपयांचा निधी येऊनही तो कुठे गेला ? असा सवाल ग्रामस्थांना उपस्थित केला आहे. या कामात ठेकेदाराने व संबंधित अधिकार्याने चुकीचे काम केले असून, याची चौकशी करण्याची मागणी सकुंडे यांनी पंचायत समितीकडे अर्जाद्वारे केली आहे. निरा-बारामती रस्ता ते फडतरे घर रस्ता हा रस्ता झाला नसतानाही ते काम पूर्ण होऊन त्याचे बिल संबंधित ठेकेदाराला अदा केले आहे. निरा-बारामती मार्गावरील जाधव घर, सावंत घर या एकाच रस्त्यासाठी दोन्ही विभागांकडून निधी टाकण्यात आला आहे.
तक्रारी देऊनही कार्यवाही नाही
एकीकडे अनेक रस्त्यांची कामे रखडली असताना तत्कालीन ग्रामपंचायत पदाधिकारी व अधिकार्यांच्या मेहरबानीमुळे एकाच रस्त्यासाठी तीन-तीन विभागांतून निधी प्राप्त झाला आहे. ज्या ठिकाणी काम झाले त्या रस्त्यांना नावे दिली नाहीत. पंचायत समितीकडे याबाबत ऑक्टोबर महिन्यात सकुंडे यांनी तक्रार दिली होती. मात्र, दोन महिने होऊनही अद्यापपर्यंत यावर कोणतीही कार्यवाही झाली नाही.
