दापोडी : मेट्रोच्या कामामुळे जुन्या पुणे-मुंबई महामार्गावरील वाहतूक बोपोडी-खडकी बाजारमार्गे ऑल सेंट स्कूलजवळून वळविण्यात आल्याने परिसरात मोठी वाहतूककोंडी होत आहे. त्यामुळे दहावी-बारावीच्या परीक्षार्थींना परीक्षेला पुण्यात जाण्यासाठी उशीर होत आहे.
बोपोडी ते खडकी बाजार मार्गे ऑल सेंट स्कूल जवळून वाहतूक वळविण्यात आली आहे. या वाहतुकीचा फटका खडकी बाजार परिसरातील अनेक शाळांतील विद्यार्थ्यांना बसत आहे.
बोपोडी ते खडकी स्टेशन दरम्यान मेट्रोचे काम वर्षभरापासून सुरू आहे. त्यामुळे जुन्या पुणे-मुंबई महामार्गावरील वाहतूक बोपोडीतून खडकी बाजार मार्गे वळविण्यात आली आहे. या मार्गावर किर्लोस्कर ऑइल इंजिन कंपनी, तसेच झोपडपट्टीही आहे. त्यामुळे नागरिकांची मोठी वर्दळ असते. त्यातच शाळा सुरू झाल्याने विद्यार्थ्यांची आणि पालकांची वर्दळ वाढली आहे. कंपनीतील कामगारांना नित्याच्या कोंडीचा सामना करावा लागत आहे. याबाबत रामभाऊ जाधव यांनी सांगितले, की परीक्षेसाठी येणार्या विद्यार्थ्यांना येथील वाहतूककोंडीचा सर्वांधिक फटका सहन करावा लागत आहे. विद्यार्थ्यांना उशिरा पोहोचावे लागत आहे. हे टाळण्यासाठी वाहतूक पोलिसांनी वाहतुकीचे योग्य नियमन करावे.
