Water storage in dams
खडकवासला: घाटमाथ्यासह पानशेत, वरसगाव, सिंहगड खोर्यात शुक्रवारी सकाळपासून पावसाळी वातावरण होते. मात्र, दिवसभर पावसाने उघडीप दिली. त्यामुळे धरणसाठ्यात गेल्या 24 तासात 0.08 टीएमसी इतकी अल्पशी वाढ झाली.
धरण परिसरात पावसाने उघडीप दिल्याने पाण्यासाठ्यातील वाढ मंदावली आहे.हवामान विभागाने आगामी पाच दिवस घाटमाथ्यासह पश्चिम पट्ट्यात पावसाच्या हलक्या सरी पडण्याची शक्यता व्यक्त केली आहे. (Latest Pune News)
या भागात पावसाचे दाट ढग दाटून येत आहेत मात्र, काही वेळाने ढग विरळ होत आहेत. शुक्रवारी सायंकाळी पाच वाजता धरणसाखळीत 22.81 टीएमसी म्हणजे 78.25 टक्के साठा झाला होता. गुरुवारी (दि.17) सायंकाळी पाच वाजता धरणसाखळीत 22.73 टीएमसी पाणी होते.
दिवसभरात टेमघर येथे 1 मिलीमीटर पावसाचा अपवाद वगळता सर्व धरणक्षेत्रात उघडीप होती.खडकवासला जलसंपदा विभागाचे उपविभागीय अभियंता मोहन भदाणे म्हणाले की, गतवर्षीच्या तुलनेत धरणसाखळीत दुप्पट पाणीसाठा आहे.
सध्या धरणात समाधानकारक पाणीसाठा आहे. अद्यापही पावसाचे अडीच महिने शिल्लक आहेत. गेल्या वर्षी 18 जुलै रोजी धरणसाखळीत 11.79 टीएमसी म्हणजे 40.46 टक्के पाणी होते.
खडकवासला धरणसाखळी
एकूण पाणी साठवणक्षमता 29.15 टीएमसी
शुक्रवारचा पाणीसाठा
22.81 टीएमसी (78.25 टक्के)
