पुणे : फर्ग्युसन रस्त्यावरील पुस्तक विक्री दुकानातून चोरट्यांनी १० हजार रुपये पळवल्याची घटना उघडकीस आली. याप्रकरणी चोरट्यांविरुद्ध डेक्कन पोलिसांनी गुन्हा दाखल केला.
याबाबत 'क्राॅसवर्ड' पुस्तक विक्री दुकानातील कर्मचारी उमाशंकर गुप्ता (वय ३७, रा. कळस, आळंदी रस्ता) यांनी फिर्याद दिली आहे. पोलिसांच्या माहितीनुसार, फर्ग्युसन रस्त्यावर क्राॅसवर्ड बुक स्टोअर्स हे पुस्तक विक्री दुकान आहे.
शुक्रवारी (५ डिसेंबर) मध्यरात्री चोरट्यांनी पुस्तक विक्री दालनाचा दरवाजा उचकटून दुकानात प्रवेश केला व गल्ल्यातून १० हजार २४३ रुपये लांबवले. या घटनेची माहिती मिळताच वरिष्ठ पोलिस निरीक्षक गिरीषा निंबाळकर, गुन्हे शाखेचे पोलिस निरीक्षक प्रसाद राऊत यांनी घटनास्थळी भेट दिली.
