पुणे: राज्यात सुरु असलेल्या राहुरी (जि.अहिल्यानगर) आणि बारामती (जि.पुणे) या विधानसभा मतदार संघातील पोट निवडणुका होत आहेत. त्या पार्श्वभुमीवर या दोन जिल्ह्यातील सहकारी संस्थांच्या निवडणुका (सहकारी गृहनिर्माण संस्था वगळून) शासन आदेशाच्या दिनांकापासून सध्या ज्या टप्प्यावर असतील त्या टप्प्यावर दिनांक 31 मे 2026 पर्यंत पुढे ढकलण्यात आल्या आहेत. तसे आदेश शासनाच्या निर्णयान्वये राज्य सहकारी निवडणूक प्राधिकरणाचे आयुक्त अनिल कवडे यांनी जारी केले आहेत.
सहकारी संस्थांच्या निवडणुका घेण्याबाबत उच्च न्यायालय, सर्वोच्च न्यायालयाने आदेशित केले आहे, अशा सहकारी संस्था वगळण्यात आल्या आहेत. शासनाचे अपर निबंधक तथा सहसचिव यांच्या दिनांक 30 मार्चच्या पत्राचा संदर्भ देऊन अहिल्यानगर व पुणे जिल्ह्यातील सहकारी संस्थांच्या निवडणूक प्रक्रिया पुढे ढकलण्याचे आल्याचे आदेश काढण्यात आल्याचे प्राधिकरणाचे सचिव अशोक गाडे यांनी म्हटले आहे.
या आदेशातून काही बाबींना सूट देण्यात आलेली आहे. त्यामध्ये सहकारी संस्थांच्या निवडणूकीनंतरची पहिली पदाधिकारी निवड करणे. चेअरमन, व्हाईस चेअरमन, अन्य पदाधिकाऱ्यांनी पदाचा राजीनामा देणे अथवा मृत्यु, अपात्र (अनर्हता) या कारणांमुळे रिक्त झालेले चेअरमन, व्हाईस चेअरमन, अन्य पदाधिकारी यांची निवड करणे. राजीनामा, मृत्यू, अपात्र या कारणांमुळे संचालक मंडळातील नैमित्तिकरित्या रिक्त झालेल्या जागेवर अन्य संचालकांची निवड करणे. क आणि ड वर्गातील सहकारी संस्थांची निवडणूक प्रक्रिया. ज्या सहकारी संस्थांच्या निवडणूक प्रक्रियेत नामनिर्देशनाचा टप्पा सुरु झाला आहे, अशा सहकारी संस्था आदींचा समावेश आहे.
