illegal bus stand construction fine
पुणे: पुणे महानगर परिवहन महामंडळाच्या (पीएमपी) वतीने शहरात बसस्थानके उभारणार्या ठेकेदाराने महापालिकेच्या कोणत्याही विभागाची परवानगी न घेता रस्त्यांची खोदाई करून बांधकाम केल्याचे उघड झाले आहे. यावर महापालिकेने कडक पाऊल उचलले असून, संबंधित ठेकेदाराकडून तीनपट दंड आकारण्यासह सर्व काम तत्काळ थांबविण्याचे आदेश आयुक्त नवल किशोर राम यांनी दिले आहेत.
पुणे शहर, पुणे महानगर प्रदेश विकास प्राधिकरण आणि पिंपरी-चिंचवड महापालिका हद्दीत बसस्थानके उभारण्यासाठी पीएमपीने 2023 मध्ये निविदा प्रक्रिया राबवून एका ठेकेदाराला काम सोपवले होते. करारानुसार, बसथांबे उभारताना महापालिकेच्या पथ विभाग, आकाशचिन्ह विभाग, विद्युत विभाग इत्यादींची परवानगी घेणे आणि खोदाई शुल्क भरणे बंधनकारक होते. (Latest Pune News)
मात्र, संबंधित ठेकेदाराने परवानगी न घेता रस्त्यांची खोदाई केली. याची माहिती महाराष्ट्र नवनिर्माण सेनेचे प्रदेश सरचिटणीस हेमंत संभूस यांना मिळाल्यानंतर त्यांनी महापालिका आयुक्तांना भेटून कारवाईची मागणी करणारे निवेदन दिले होते. याबाबत आयुक्त नवल किशोर राम यांना विचारले असता झालेला हा प्रकार गंभीर असून संबंधित ठेकेदावर दंडात्मक कारवाई करण्याचे आदेश त्यांनी पथ विभागाचे प्रमुख अनिरुद्ध पावसकर यांना दिले आहेत.
याबाबत अनिरुद्ध पावसकर यांनी सांगितले की, शहरात कुठे कुठे अशा पद्धतीने बसस्थानके उभारली गेली आहेत, याचे संपूर्ण सर्वेक्षण सुरू केले आहे. या तपासणीनंतरचा अहवाल महापालिका आयुक्त नवल किशोर राम यांच्याकडे सादर केला जाणार आहे. त्यानंतर पुढील कारवाई केली जाईल.
महापालिकेची ठाम भूमिका
महापालिकेच्या पथ विभागाने ठेकेदाराची परवानगीशिवाय झालेली खोदाई स्पष्टपणे मान्य केली असून, तीनपट दंड आकारला जाणार असल्याचे सांगितले. तसेच, परवानगी न घेतलेल्या सर्व बसस्थानकांची शहानिशा करण्याचे आदेशही दिले आहेत.
संबंधित ठेकेदाराने पथ विभागाची परवानगी न घेता रस्ते खोदाई केल्याचे आढळले आहे. त्यामुळे त्याच्यावर तीनपट दंड आकारला जाईल आणि परवानगीशिवाय उभारलेली बसस्थानके शोधून काढण्यासाठी सर्वेक्षण सुरू केले आहे.
-अनिरुद्ध पावसकर, प्रमुख, पथ विभाग, पुणे महापालिका
