पुणे; पुढारी वृत्तसेवा : कसबा मतदारसंघाच्या पोटनिवडणुकीसाठी वापरण्यात येणार्या मतदानयंत्रांची निवडणूक निरीक्षक नीरज सेमवाल आणि पोलिस निवडणूक निरीक्षक अश्विनी कुमार यांच्या उपस्थितीत संगणकीय पद्धतीने मतदान केंद्रनिहाय द्वितीय सरमिसळ (रँडमायझेशन) करण्यात आली. त्यानंतर ही यंत्रे कोरेगाव पार्क येथील भारतीय अन्न महामंडळाच्या गोदामात सुरक्षित ठेवली आहेत. गोदाम परिसरात पोलिस बंदोबस्त ठेवला आहे.
जिल्हा निवडणूक अधिकारी स्तरावर मतदानयंत्रांची प्रथमस्तरीय सरमिसळ केल्यानंतर कसब्यासाठी 756 बॅलेट युनिट, 378 कंट्रोल युनिट आणि 405 व्हीव्हीपॅट यंत्रे वितरित केली आहेत. बॅलेट युनिट आणि कंट्रोल युनिट एकूण सरासरीच्या 140 टक्के आणि व्हीव्हीपॅट यंत्रे 150 टक्के उपलब्ध झाली आहेत. उमेदवार व त्यांच्या प्रतिनिधींना माहिती देऊन प्रात्यक्षिकही करून दाखविले गेले आहे. या वेळी निवडणूक निर्णय अधिकारी स्नेहा किसवे-देवकाते, सहायक निवडणूक निर्णय अधिकारी राधिका हावळ-बारटक्के, जिल्हा सूचना विज्ञान अधिकारी प्रमोद बोरोले उपस्थित होते.
जिल्हाधिका-यांची स्ट्राँगरूमला भेट
चिंचवड आणि कसबा पेठ विधानसभा मतदारसंघांतील मतदानयंत्रे ठेवण्याच्या स्ट्राँगरूमला जिल्हाधिकारी डॉ. राजेश देशमुख यांनी भेट दिली. सुरक्षा व्यवस्थेची तसेच त्यांनी मतदान प्रक्रियेसाठी मतदानयंत्रे तयार करण्याच्या प्रक्रियेचीही पाहणी केली. भारत निवडणूक आयोगाच्या निर्देशानुसार निवडणूक प्रक्रिया व्हावी यादृष्टीने खबरदारी घ्यावी, अशा सूचना त्यांनी अधिकार्यांना दिल्या.
जिल्हाधिकारी डॉ. राजेश देशमुख यांनी मतदानयंत्रांच्या कमिशनिंग प्रक्रियेची प्रत्यक्ष पाहणी करून संबंधिताना सूचना दिल्या. तसेच मतदान केंद्र क्रमांक 61 च्या सर्व कमिशनिंग प्रक्रियेची तपासणी आणि खात्री करून जिल्हाधिकारी डॉ. देशमुख यांनी स्वतः या केंद्राची मतदानयंत्रे सीलबंद (ईव्हीएम सिलिंग) केली. जिल्हाधिकारी डॉ. देशमुख यांनी एफसीआय गोदाम येथील स्ट्राँगरूमची पाहणी केली. त्यांनी ईव्हीएम यंत्र जोडणी (पेअरिंग) प्रक्रियेची पाहणी करून सुरक्षा व्यवस्थेबाबत अधिकार्यांना सूचना दिल्या.
महाविद्यालयात मतदान जनजागृती
कसबा पेठ व चिंचवड मतदारसंघांत व्यापक मतदान जागृती अंतर्गत जिल्हा निवडणूक अधिकारी कार्यालयाकडून फोरसाईट कॉमर्स महाविद्यालयात मतदार जनजागृती अभियान आयोजित केले होते. जिल्हा निवडणूक अधिकारी कार्यालय, नेहरू युवा केंद्र आणि स्वराज्य वैद्यकीय संघ यांच्या संयुक्त विद्यमानाने स्वराज्य टास्क फोर्सचे संचालक दीपक कारकर, फोरसाईट कॉमर्स महाविद्यालयाचे प्राचार्य, सचिव, शिक्षक वृंद आणि विद्यार्थी उपस्थित होते. या वेळी मतदान आपला हक्क असून, सर्वांनी मतदान करावे. आपल्या परिसरातील नागरिकांना मतदान करण्याविषयी प्रवृत करावे, असे आवाहन उपजिल्हाधिकारी अजय पवार यांनी विद्यार्थ्यांना केले. मतदान जनजागृतीविषयी पथनाट्य सादर करण्यात आले.
