पुणे; पुढारी वृत्तसेवा : शिवाजीनगर येथील कामगार पुतळा परिसरातील मेट्रोच्या कामासाठी वाहतूक व्यवस्थेत बदल करण्यात आला आहे. येथील मेट्रो मार्गावर लोखंडी गर्डर टाकण्याचे काम हाती घेण्यात येणार आहे. रविवारपासून (1 जानेवारी) या भागातील वाहतूक पर्यायी मार्गाने वळविण्यात येणार असून, मंगळवार पेठेतील शाहीर अमर शेख चौकाकडे जाणारी वाहतूक 19 जानेवारीपर्यंत बंद ठेवण्यात येणार आहे.
वाहनचालकांनी पर्यायी मार्गाचा वापर करावा, असे आवाहन वाहतूक शाखेचे पोलिस उपायुक्त विजयकुमार मगर यांनी केले आहे. शिवाजीनगर न्यायालयाकडून पुणे स्टेशनकडे जाणारी वाहने कामगार पुतळा येथील पुलावरून मंगळवार पेठेतील शाहीर अमर शेख चौकाकडे जातात. या भागात मेट्रो मार्गिकेवर लोखंडी गर्डर टाकण्याचे काम रविवारपासून हाती घेण्यात येणार असून, 19 जानेवारीपर्यंत हे काम सुरू राहणार आहे, असे पोलिस उपायुक्त मगर यांनी कळविले आहे.
वाहनचालकांनी कामगार पुतळा, शिवाजीनगर न्यायालय प्रवेशद्वार क्रमांक चार, छत्रपती शिवाजी महाराज पुतळा चौकातून इच्छितस्थळी जावे तसेच वेधशाळा चौकातून डावीकडून वळून अभियांत्रिकी महाविद्यालय चौक, प्रादेशिक परिवहन चौकमार्गे इच्छितस्थळी जावे.
