पुणे: केंद्रीय माध्यमिक शिक्षण मंडळ अर्थात सीबीएसईने दहावीच्या दुसऱ्या बोर्ड परीक्षेचा निकाल जाहीर केला आहे. राष्ट्रीय शिक्षण धोरण २०२० अंतर्गत प्रथमच सुरू केलेल्या दोन बोर्ड परीक्षांच्या योजनेअंतर्गत ही दुसरी परीक्षा घेण्यात आली. यामध्ये मुख्य परीक्षा आणि द्वितीय परीक्षेचे निकाल एकत्रित केल्यास सीबीएसई बोर्डाचे एकूण उत्तीर्णता प्रमाण ९६.७८ टक्क्यांवर पोहोचली असल्याचे सीबीएसईने स्पष्ट केले आहे.
सीबीएसई बोर्डाकडून दुसऱ्या सत्रासाठी १५ मे ते २१ मे २०२६ या कालावधीत घेण्यात आलेल्या परीक्षेसाठी ६ लाख ६४ हजार २७ विद्यार्थ्यांनी नोंदणी केली होती. त्यापैकी ६ लाख ६३ हजार ७७७ विद्यार्थी उपस्थित होते. दुसऱ्या परीक्षेत गुणवृद्धी करण्यासाठी ५ लाख १३ हजार ९५५ विद्यार्थ्यांनी भाग घेतला. त्यापैकी ३ लाख ८ हजार ९५ विद्यार्थी (५९.९५ टक्के) यशस्वी झाले. कंपार्टमेंट प्रवर्गातील १ लाख ४९ हजार ८२२ विद्यार्थ्यांपैकी ७८ हजार ५०३ विद्यार्थी उत्तीर्ण झाले. ज्यामुळे या प्रवर्गातील उत्तीर्णता ५२.४० टक्के राहिली. मुख्य परीक्षा आणि द्वितीय परीक्षेचे निकाल एकत्रित केल्यास सीबीएसई बोर्डाचे एकूण उत्तीर्णता प्रमाण ९६.७८ टक्क्यांवर पोहोचले आहे.
विद्यार्थ्यांना निकाल डिजीलॉकर प्लॅटफॉर्मद्वारे तत्काळ उपलब्ध झाला असून, विद्यार्थी आपली डिजिटल गुणपत्रिका सहज डाउनलोड करू शकतात. पहिल्या बोर्ड परीक्षेत ९३.७० टक्के उत्तीर्णता नोंदवली गेली होती. नियमित विद्यार्थ्यांसाठी दोन्ही परीक्षांपैकी उत्तम गुण विचारात घेऊन अंतिम निकाल तयार केला आहे. सीबीएसईने विद्यार्थ्यांना सूचना दिली आहे की, गुणपत्रिका काळजीपूर्वक तपासावी. कोणतीही त्रुटी आढळल्यास तातडीने मंडळाशी संपर्क साधावा. दोन बोर्ड परीक्षांच्या माध्यमातून विद्यार्थ्यांना अधिक संधी मिळाली असल्याने राष्ट्रीय शैक्षणिक धोरणाच्या उद्देशाला बळकटी मिळाली आहे.
यशस्वी विद्यार्थ्यांचे अभिनंदन करताना अपयशी किंवा सुधारणा करणाऱ्या विद्यार्थ्यांना पुढील प्रयत्नांसाठी प्रोत्साहन दिले जात आहे. एकूणच, या वर्षीचा सीबीएसई दहावीचा निकाल विद्यार्थ्यांसाठी समाधानकारक ठरला आहे. उच्च उत्तीर्णता दर आणि डिजिटल सुविधांमुळे विद्यार्थ्यांना पारदर्शक आणि सोयीस्कर अनुभव मिळाला. पुढील शैक्षणिक प्रवासासाठी विद्यार्थ्यांनी करिअर मार्गदर्शन घ्यावे, असे आवाहन सीबीएसईने केले आहे.
डिजीलॉकरद्वारे गुणपत्रक डाउनलोड करण्याची सोय
विद्यार्थ्यांना डिजीलॉकरद्वारे गुणपत्रक डाउनलोड करण्याची सोय उपलब्ध आहे. यासाठी डिजीलॉकर ॲप किंवा वेबसाइट उघडावी. नोंदणीकृत मोबाईल नंबर किंवा आधार कार्डने लॉगिन करा. नवीन वापरकर्त्यांनी खाते तयार करावे. 'Issued Documents' विभागात सीबीएसई पर्याय निवडून दहावी २०२६ ची गुणपत्रिका शोधा. रोल नंबर, शाळा क्रमांक आणि ॲडमिट कार्ड आयडी भरून डाउनलोड करा. छापील प्रमाणपत्रे संबंधित शाळांमार्फत वितरित केली जातील, असे देखील स्पष्ट केले आहे.
