Pune Ganeshotsav 2025: श्रीमंत भाऊसाहेब रंगारी गणपती मंडळाचा वासापूजन सोहळा उत्साहात

Bhausaheb Rangari Ganpati Vasapuja

पुणे: गणेशोत्सवात लाखो भाविक येतात. पोलिसांची संख्या त्या तुलनेत कमी आहे, त्यामुळे प्रत्येक कार्यकर्त्याने पोलिसांसारखे काम करावे, असे आवाहन पश्चिम विभागाचे अप्पर पोलिस आयुक्त राजेश बनसोडे यांनी केले.

हिंदुस्थानातील पहिला सार्वजनिक गणपती श्रीमंत भाऊसाहेब रंगारी गणपती ट्रस्टतर्फे आयोजित वासापूजन सोहळा बनसोडे यांच्या उपस्थितीत पार पडला. या वेळी ते बोलत होते. (Latest Pune News)

या वेळी बनसोडे म्हणाले, हिंदुस्थानातील पहिले सार्वजनिक गणेश मंडळाच्या वासा पूजनाचा मान दिल्याबद्दल आभारी आहे. गणेशोत्सवाची आता सुरुवात होत आहे. हा उत्सव निर्विघ्नपणे साजरा होईल, त्यासाठी रंगारी ट्रस्टसह सर्व गणेश मंडळाच्या कार्यकर्त्यांची आम्हाला मदत होईल, अशी अपेक्षा त्यांनी व्यक्त केली.

वासापूजन सोहळ्यापूर्वी रंगारी भवनात बाप्पाची आरती झाली. या वेळी शिवमुद्रा ढोल ताशा पथकाने केलेल्या वादनाने उपस्थित गणेश भक्तांची मने जिंकली.