बारामती: खातेबदल होणार हे मला माध्यमातूनच कळते आहे. माझ्याकडे याबाबत कोणतीही अधिकृत माहिती नाही; मात्र बारामतीकर न मागता खूप काही देतात, अशी प्रतिक्रिया क्रीडामंत्री दत्तात्रय भरणे यांनी दिली. बारामतीत ते पत्रकारांशी बोलत होते.
मंत्री भरणे म्हणाले, उपमुख्यमंत्री अजित पवार जो निर्णय घेतील व माझ्यावर जी जबाबदारी टाकतील तो माझ्यासारखा कार्यकर्ता प्रामाणिकपणे पार पाडेल. मी आज पुरंदर-इंदापूर दौर्यावर होतो; मात्र अद्याप मला कुठलीही अधिकृत माहिती नाही.(Latest Pune News)
बारामतीकर न सांगता खूप काही देतात. माझ्या महाविद्यालयीन जीवनापासून उपमुख्यमंत्री अजित पवार यांनी मला कारखान्यावर न मागता संधी दिली. सन 1996 मध्ये बँकेच्या संचालकपदावर, अध्यक्षपदाची संधी दिली.
जिल्हा परिषद अध्यक्ष, आमदार, मंत्री पदावर न सांगता संधी दिली. उपमुख्यमंत्री अजित पवार हे माणसाची पारख करणारे नेते आहेत. बारामतीकरांना चांगली पारख आहे. ते योग्य माणसाला योग्य संधी देतात.
कृषी खात्याची जबाबदारी तुमच्यावर दिल्यानंतर ती जबाबदारी तुम्ही कशी पार पाडणार, या प्रश्नावर भरणे म्हणाले, अद्याप कृषी खात्याबाबत कोणत्याही प्रकारची अधिकृत घोषणा नाही; मात्र ज्या वेळी अधिकृत घोषणा होईल, त्या वेळी याबाबत भूमिका मांडता येईल.
