बारामती: बारामती नगरपरिषदेच्या पंचवार्षिक निवडणुकीसाठी उमेदवारी अर्ज माघारी घेण्याचा अंतिम दिवस शुक्रवार (दि. 21) आहे. येथे उपमुख्यमंत्री अजित पवार यांची राष्ट्रवादी पक्ष चिन्हावर निवडणूक लढवत आहे. ’एकला चलो रे’ अशी त्यांची भूमिका असल्याने त्यांनी सर्व जागचे उमेदवार जाहीर केले आहेत. महायुतीतील भाजप-शिवसेनेने स्वतंत्रपणे नगराध्यक्ष व नगरसेवकपदासाठी अर्ज केले आहेत. ते एकत्र येणार का, हे अद्याप ठरलेले नाही.
उपमुख्यमंत्री अजित पवार यांच्या राष्ट्रवादीची नगरपरिषदेवर यापूर्वी सत्ता आहे. यंदा राष्ट्रवादी शरदचंद्र पवार पक्षानेही नगराध्यक्षपदासह काही जागांवर उमेदवार दिले आहेत. आमचे उमेदवार पक्ष चिन्हावर लढतील असे या पक्षाचे जिल्हाध्यक्ष विजय कोलते यांनी बारामतीत जाहीर केले होते. परंतु, सर्व जागी या पक्षाला उमेदवार उभे करता आलेले नाहीत. त्यामुळे शिवसेना (उबाठा), कॉंग््रेास, वंचित बहुजन आघाडी यासह अन्य समविचारी पक्षांना सोबत घेऊनच राष्ट्रवादी (श. प.) ला येथे निवडणूक लढवावी लागेल, हे निश्चित आहे.
महायुतीत सत्तेत असलेल्या भाजपने येथे नगराध्यक्षपदाचा उमेदवार दिला आहे. 31 जागी सदस्यपदासाठी अर्ज दाखल केला आहे. शिवसेनेने देखील नगराध्यक्षपदासाठी अर्ज दाखल केला आहे. अन्य 10 ते 12 सदस्यांच्या जागांवर अर्ज दाखल केला आहे. हे दोन्ही पक्ष एकत्रितपणे निवडणुकीला सामोरे जातील अशी शक्यता होती. परंतु, नगराध्यक्षपदावरून माघार कोणी घ्यायची, हा पेच निर्माण झाला आहे. भाजप कोणत्याही परिस्थितीत पक्ष चिन्हावरच नगराध्यक्ष व अन्य जागा लढवत आहे. त्यामुळे सेनेने नगराध्यक्षपदाच्या जागेचा हट्ट सोडला तर चर्चा होऊ शकते, असे भाजपचे म्हणणे आहे. दुसरीकडे शिवसेना पक्षाने भाजपनेच एक पाऊल मागे यावे असा प्रस्ताव ठेवला आहे. चर्चेच्या या गुऱ्हाळात अद्याप दोन्ही पक्षांचा समेट झालेला नाही. शुक्रवारी अर्ज मागे घेण्याचा अखेरचा दिवस असल्याने या दिवशी काय घडामोडी घडतात, त्यावर निवडणुकीचे भवितव्य असेल.
उपमुख्यमंत्री करणार प्रचाराचा प्रारंभ
उपमुख्यमंत्री अजित पवार हे शुक्रवारी (दि. 21) सायंकाळी बारामतीत दाखल होत आहेत. ते बारामतीत त्यांच्या राष्ट्रवादीच्या प्रचाराचा शुभारंभ करणार आहेत. शहरातील सिद्धेश्वर मंदिर येथे पवार यांची सभा होणार आहे. अन्य पक्षांनी घरोघरी जात गाठीभेटी घेणे सुरू केले आहे.
बहुजन समाज पक्ष स्वतंत्र लढणार
बहुजन समाज पक्षाने नगराध्यक्षपदासह अन्य काही सदस्यांच्या जागेवर अर्ज दाखल केले आहेत. त्यांचा इतर कोणाबरोबर जाण्याचा इरादा दिसत नाही. ते स्वतंत्रपणेच निवडणुकीला सामोरे जातील अशी चिन्हे आहेत.
