बारामती: हायवा, डंपर यासारख्या अवजड वाहनांनी बारामती शहरात यापूर्वी बळी घेतल्यानंतर त्याचीच पुनरावृत्ती सोमवारी (दि. २९) झाली. शहरातील ढवाण पाटील चौकात सायकलवरून जाणाऱ्या एका वृद्धाला डंपरने चिरडले. त्यात मारुती उमाजी पारसे (वय ५५, रा. आनंदनगर, बारामती) या ज्येष्ठाचा जागीच मृत्यू झाला.
या अपघातानंतर संतप्त बारामतीकरांनी अपघातग्रस्त डंपर तसेच त्या रस्त्यावरून जाणाऱ्या दुसऱ्या एका डंपरवर दगडफेक करत मोठा संताप व्यक्त केला. रस्त्यावरच ठिय्या मांडत माणसे मारणारी ही वाहने थांबवणार कधी असा संतप्त सवाल उपस्थित केला. (Latest Pune News)
दोन महिन्यांपूर्वी बारामती शहरातील खंडोबानगर येथील महात्मा फुले चौकात डंपरखाली आल्याने दोन मुलींसह वडीलांचा मृत्यू झाल्याची दुदैवी घटना घडली होती. या अपघाताची घटना अजूनही ताजी असतानाच पुन्हा डंपरने एकाचा जीव घेतल्याने बारामतीकर कमालीचे संतप्त झाले आहेत.
फलटण रस्त्यावरील ढवाण पाटील चौकात सोमवारी दुपारी सव्वा बारा वाजता ही घटना घडली. हा डंपर शहरात प्रवेश करत असतानाच त्याने सायकलवरून जात असलेल्या पारसे हे अचानक डंपरच्या खाली चिरडले गेले. त्यात त्यांचा जागीच मृत्यू झाला.
नागरिकांचा संताप आणि तणावपूर्ण वातावरण...!
या अपघातानंतर परिसरातील नागरिकांचा संताप प्रचंड वाढला. त्यांनी हायवा डंपरवर दगडफेक केली. ढवाण पाटील चौक परिसरात काही काळ भीती आणि गोंधळाचे वातावरण निर्माण झाले. नागरिकांनी हायवा डंपर चालकांवर कठोर कारवाई होत नसल्याबद्दल संताप व्यक्त केला. रस्त्यावरच ठिय्या मांडत रास्ता रोको आंदोलन केले गेले. पोलिस, आरटीओ प्रशासन अशा वाहनांवर कारवाई का करत नाही, असा सवाल नागरिकांनी उपस्थित केला.
