बारामती: कोऱ्हाळे बुद्रूक (ता. बारामती) गावच्या हद्दीत मतकरवस्ती, माळशिकारेवाडी येथे सार्वजनिक गणोशोत्सव विसर्जन मिरवणुकीमध्ये अश्लिल हावभावासह बिभस्त नृत्य करणाऱ्या नृत्यांगणांसह मंडळाच्या पदाधिकाऱ्यांवर वडगाव निंबाळकर पोलिसांनी कारवाई केली. या प्रकरणी पोलिसांनी सात जणांविरोधात गुन्हा दाखल केला.
याप्रकरणी नृत्य करणाऱ्या राधा संग्राम घुले (वय २९), मिनाक्षी बापूराव रुपनवर (वय ३५), काजल नितीन शिंदे (वय २६, सर्व रा. लाकडी, ता. इंदापूर), डाॅल्बी मालक रोहित हणमंत धुमाळ (रा. गोखळी, ता. फलटण, जि. सातारा), राहुल दिलीप माळशिकारे, दिपक सुभाष माळशिकारे, निखिल जालिंदर माळशिकारे (रा. माळशिकारेवाडी, कोऱ्हाळे बुद्रूक) यांच्या विरोधात पोलिसांनी भारतीय न्याय संहितेसह महाराष्ट्र पोलिस अधिनियमानुसार गुन्हा दाखल केला.
गणेश विसर्जन मिरवणूकी दरम्यान ट्रॅक्टर (एमएच ४२, क्यू २६४४) व त्याला जोडलेल्या ट्राॅली (एमएच ४२ बीएस २१२०) मध्ये डाॅल्बी संगीताच्या तालावर नृत्यांगणा सार्वजनिक ठिकाणी अश्लिल हावभाव, अंगविक्षेप व बिभस्त नृत्य करत होत्या. वडगाव निंबाळकर पोलीसांच्या ही बाब निदर्शनास येताच त्यांनी नृत्यांगणांसह मंडळाचे पदाधिकारी व प्रोत्साहन देणाऱ्यांविरोधात गुन्हा दाखल केला. मंडळाच्या अध्यक्षांना भारतीय नागरिक सुरक्षा संहिता २०२३ च्या कलम १६८ अन्वये नोटीस देण्यात आली होती.
त्याचे उल्लंघन झाल्याचे निदर्शनास आल्याने ही कायदेशीर कारवाई केल्याचे सहाय्यक पोलिस निरीक्षक जीवन मोहिते यांनी सांगितले. गणेशोत्सव विसर्जन मिरवणुकीदरम्यान कायदा व सुव्यवस्था अबाधित राहावी, यासाठी शासनाच्या तसेच पोलीस प्रशासनाच्या सूचनांचे काटेकोर पालन करण्याचे आवाहन मोहिते यांनी केले.
