Baramati Independence Day flagpole
बारामती: राष्ट्रभक्तीचे जाज्वल्य प्रतीक असलेला बारामती शहरातील सर्वांत उंच राष्ट्रध्वज स्तंभाचे येत्या स्वातंत्र्यदिनी 15 ऑगस्ट रोजी लोकार्पण केले जाणार आहे. उपमुख्यमंत्री अजित पवार यांच्या हस्ते व राज्यसभेच्या खासदार सुनेत्रा पवार यांच्या उपस्थितीत संध्याकाळी साडेसहा वाजता तीन हत्ती चौकातील नटराज नाट्यकला मंदिरासमोरील जागेमध्ये हा कार्यक्रम होणार आहे. याबाबत नटराज नाट्यकला मंडळाचे अध्यक्ष किरण गुजर यांनी माहिती दिली.
बारामती शहरात सामाजिक उत्तरदायित्व निधीतून (सीएसआर) तीस मीटर उंचीचा (शंभर फूट उंच) राष्ट्रध्वज स्तंभ उभारण्यात आला आहे. उपमुख्यमंत्री अजित पवार यांच्या संकल्पनेतून हा स्तंभ साकारण्यात आला आहे. बारामतीला स्वातंत्र्य चळवळीसह स्वातंत्र्य सैनिकांचा वैभवशाली वारसा आहे. या पार्श्वभूमीवर देशभक्ती अधिक जाज्वल्य व्हावी या उद्देशाने हा स्तंभ उभारण्यात आल्याचे किरण गुजर यांनी सांगितले. (Latest Pune News)
दरम्यान, राष्ट्रध्वज स्तंभ लोकार्पण सोहळ्यानिमित्त देशभक्तीपर गीत व नृत्यांचा कार्यक्रम व फटाक्यांची आतषबाजी करण्यात येणार असून, फायर शोचेही आयोजन करण्यात आले आहे. हा कार्यक्रम सर्व बारामतीकरांसाठी खुला असणार आहे. तीन हत्ती चौक व भिगवण चौका दरम्यानच्या दोन्ही रस्त्यांवर नागरिकांच्या बसण्याची व्यवस्था करण्यात आली आहे.
वाहतूक व्यवस्थेत बदल
कार्यक्रमामुळे वाहतूक व्यवस्थेत बदल करण्यात येणार आहे. तीन हत्ती चौकात येण्यासाठी वसंतनगर, म.ए.सो. विद्यालय, क्लॉक टॉवर रस्ता, नीरा डावा कालवा रस्ता, महावीर भवन रस्ता बंद ठेवण्यात येणार असून, नागरिकांनी भिगवण चौकातूनच कार्यक्रमस्थळी यावे.
डौलाने फडकणार राष्ट्रध्वज
बारामती पंचक्रोशीमध्ये इतका उंच राष्ट्रध्वज स्तंभ नाही. प्रथमच हा स्तंभ साकारत असून, या स्तंभावर भारतीय तिरंगा मोठ्या डौलाने फडकणार आहे. देशभक्तीची भावना यामुळे निश्चितपणे वाढीस लागणार आहे.
