पुणे: पार्लरमध्ये काम देण्याच्या बहाण्याने बांग्लादेशातील एका सतरावर्षीय अल्पवयीन युवतीला अवैध पद्धतीने भारतात आणले आणि बुधवार पेठेत वेश्या व्यवसायात ढकलल्याचा प्रकार समोर आला आहे. युवतीने वेश्या व्यवसायास नकार देताच तिला खोलीत डांबून बेल्ट, हाताने मारहाण करून तिला गायब करण्याची धमकी देण्यात आली.
दरम्यान, पुण्यातील एका सामाजिक संस्थेच्या माध्यमातून या घटनेला वाचा फुटली असून, सहकारनगर पोलिसांनी शुक्रवारी रात्री दोन वाजल्यापासून सकाळी अकरापर्यंत शोधमोहीम राबवून पीडित युवतीची सुटका केली. (Latest Pune News)
या प्रकरणी सामाजिक संस्थेच्या वतीने फिर्याद दाखल करण्यात आली असून, पोलिसांनी अभिषेक संथेबेन्नुर, तमन्ना शेख आणि रकीब खान यांच्याविरुद्ध पोस्को, पिटा अॅक्ट आणि पारपत्र अधिनियमांचे उल्लंघन अशा विविध कलमांन्वये गुन्हा दाखल केला आहे. यातील अभिषेक आणि तमन्ना या दोघांना पोलिसांनी अटकदेखील केली आहे.
पोलिसांनी दिलेल्या माहितीनुसार, पीडित युवती आरोपी तमन्ना हिच्या ओळखीची आहे. तिनेच तिला अवैध पद्धतीने भारतात प्रवेश करून बंगळुरू येथे येण्यास भाग पाडले. तमन्ना हिने तिला चोरीच्या मार्गाने कसा भारतात प्रवेश करायचा, या बाबतचे मार्गदर्शन केले होते.
पार्लरमध्ये काम मिळवून देण्याचे प्रलोभन तमन्ना हिने युवतीला दाखविले होते. सुरुवातीला युवती बंगळुरू येथे रकीब याच्याकडे आली. तो तमन्नाच्या ओळखीचा आहे. त्याने युवतीकडून स्वतःच्या आर्थिक फायद्यासाठी वेश्या व्यवसाय करून घेतला. तिने तसे करण्यास नकार दिला असता, रकीब याच्यासोबत तिचा वाद झाला. त्यानंतर युवती पुण्यात आली होती.
आरोपी अभिषेक हादेखील तमन्ना हिचा मित्र आहे. तो शहरातील हॉटेलमध्ये काम करतो. त्याने युवतीला बुधवार पेठेत स्वतःच्या आर्थिक फायद्यासाठी वेश्या व्यवसाय करण्यास भाग पाडले. युवतीने वेश्या व्यवसायाला नकार दिला असता, तमन्ना हिने युवतीला अभिषेक याच्यामार्फत सहकारनगर पोलिस ठाण्याच्या हद्दीत एका खोलीत डांबून ठेवले. तेथे तिला त्याने हाताने आणि बेल्टने मारहाण करून गायब करण्याची आरोपींनी धमकी दिली.
तरुणीने याबाबत बांग्लादेशातील पोलिसांना मोबाईलवरून संपर्क साधला. तिने तिच्यासोबत घडलेल्या प्रकाराची माहिती त्यांना दिली. त्यांनी ही माहिती आपल्याकडील एका सामाजिक संस्थेला दिली. त्यांनी पुण्यातील संबंधित सामाजिक संस्थेला संपर्क साधला.
त्यानुसार सहकारनगर पोलिसांना ही माहिती मिळाली होती. पोलिस निरीक्षक गुन्हे सुरेखा चव्हाण यांच्या पथकाने तत्काळ पीडित युवतीचा शोध घेण्यास सुरुवात केली. शुक्रवारी मध्यरात्री दोन वाजल्यापासून सकाळी अकरा वाजेपर्यंत शोधमोहीम हाती घेऊन युवतीला डांबून ठेवलेले ठिकाण शोधून तिची सुटका केली. या प्रकरणी दोघा आरोपींना अटक करण्यात आली असून, पुढील तपास सुरू असल्याची माहिती चव्हाण यांनी दिली.
